Tramp: Ýkraınaǵa qatysty kelisimderge kelýdiń jańa merzimi — 10–12 kún

ASTANA. KAZINFORM — AQSh prezıdenti Donald Tramp dúısenbiden bastap Reseı men Ýkraına arasyndaǵy qaqtyǵysty retteý úshin Vladımır Pýtınge 10–12 kún beretinin málimdedi, dep habarlaıdy The Hill basylymy.

Bul týraly Aq úı basshysy Shotlandııada Ulybrıtanııa premer-mınıstri Kır Starmermen ótkizgen baspasóz máslıhatynda aıtty.

— Kútýdiń máni joq. Biz eshqandaı ilgerileýdi baıqamaı otyrmyz, — dedi Tramp, nege ýaqyt shekteýin qysqartqanyn túsindirip.

14 shildede Tramp Vashıngton men Máskeý 50 kún ishinde kelisimge kelmegen jaǵdaıda, AQSh Reseı men onyń saýda seriktesterine 100% ımporttyq salyq engizetinin málimdegen edi.

Alaıda dúısenbi kúni ol osy 50 kúndik merzimdi qysqartatynyn aıtyp, jańa talap qoıdy. Bul pikirdi Tramp Ulybrıtanııa premerimen kezdesý kezinde jýrnalıster suraǵyna jaýap bere otyryp jetkizdi.

Qazirgi tańda Donald Tramp Shotlandııada resmı saparmen júr. Keshe, 27 shilde kúni, AQSh pen Eýropalyq komıssııanyń tóraıymy Ýrsýla fon der Lıaıen ózara tarıfterge qatysty kelisimge kelgen bolatyn. Eger mámile jasalmaǵan jaǵdaıda, Vashıngton 1 tamyzdan bastap EO-dan keletin barlyq ónimge 30% tarıf engizemiz dep málimdegen.