Tramp Ýkraınaǵa barlyq áskerı kómekti toqtatýǵa buıryq berdi
ASTANA. KAZINFORM – AQSh prezıdenti Donald Tramp Ýkraınaǵa áskerı kómekti el basshylyǵy «beıbitshilikke adaldyǵyn» kórsetkenge deıin toqtatýǵa buıryq berdi. Bul Tramptyń Aq úıdiń Sopaqsha kabınetinde Ýkraına prezıdenti Vladımır Zelenskıımen daýlasqannan keıin birneshe kún ótken soń boldy, dep habarlaıdy VVS.
— Prezıdent beıbitshilikti jaqtaıtynyn anyq bildirdi. Biz úshin áriptesterimizdiń de osy maqsatqa umtylǵany kerek. Biz kómekti toqtatyp, onyń máseleni sheshýge kómektesetinine kóz jetkizý úshin qaıta qarastyryp jatyrmyz, — dep keltirdi álemdik aqparat agenttikteri men amerıkalyq BAQ Aq úıdiń resmı ókiliniń sózderin.
Tramptyń ózi ázirge bul sheshimge qatysty pikir bildirgen joq, Aq úıden de resmı aqparat túsken joq.
Dúısenbide «Ýkraınaǵa áskerı kómekti toqtatasyz ba?» degen suraqqa Tramp: «Ary qaraı ne bolatynyn kóremiz» dedi.
Bloomberg jáne Fox News habarlaýynsha, úzilis Tramp Ýkraına basshylyǵynyń beıbitshilikke umtylysyn tanytqanyna kóz jetkizgenshe sozylady.
— AQSh Ýkraınaǵa qazirgi áskerı kómektiń barlyǵyn Tramp el basshylarynyń beıbitshilikke adaldyq tanytatynyna qanaǵattanbaıynsha toqtatady, — dep habarlady Bloomberg Aq úı ókiliniń sózin.
«Bul kómektiń turaqty aıaqtalýy emes, bul úzilis» dep habarlady Fox News ákimshilik qyzmetkerine silteme jasap.
Bloomberg málimetinshe, bul sheshim Ýkraınaǵa jetkizilmegen barlyq amerıkalyq áskerı tehnıkaǵa, sonyń ishinde tranzıttegi nemese Polsha arqyly ótetin tranzıtti kútip turǵan qarýǵa da qatysty bolady.
Habarlanǵandaı, sheshimniń oryndalýyn qadaǵalaý Pentagon basshysy Pıt Hegsetke júktelgen.
Dúısenbi kúni keshke Wall Street Journal basylymy AQSh-tyń qazirgi jáne burynǵy sheneýnikterine silteme jasaı otyryp habarlaǵanyndaı, Tramp ákimshiligi Ýkraınaǵa jańa qarý-jaraq satýdy qarjylandyrýdy toqtatqanyn jáne Kıevtiń reseılik kúshterge qarsy turý qabiletine qaýip tóndiretin AQSh qoımalarynan jetkizilimderdi toqtatýdy qarastyryp jatyr.
Sońǵy aptalarda Aq úı syrtqy kómekti toqtatqan kezde jańa jetkizilimderdi qarjylandyrý is júzinde toqtatyldy, dep jazdy basylym, osy arada Ýkraınaǵa negizgi qarý-jaraq jetkizý arnasyn jabýǵa yqtımal qadamdar Tramp pen Zelenskıı arasyndaǵy kıkiljińnen birneshe kún ótken soń jasaldy.
Memlekettik hatshy Marko Rýbıo buǵan deıin Ýkraınaǵa jetkizilimderdi syrtqy kómekke tyıym salý týraly buıryqqa qol qoıǵan, biraq Memlekettik departamenttiń joǵary laýazymdy qyzmetkeri Pıter Marokko Kıevke kómektiń kelýine ruqsat berý úshin Pentagonǵa qajetti hat jibergen joq, dedi WSJ áńgimelesýshileri.
Amerıkalyq sheneýnikterdiń aıtýynsha, jańa áskerı jetkizilimder bolmasa, Ýkraınanyń Reseıge qarsy soǵysty qazirgi qarqynmen jalǵastyrý úshin qarý-jaraǵy jyldyń ortasyna deıin jetkilikti bolýy múmkin. Bul Tramptyń Aq úıge oralǵanǵa deıin Kıevke qarý-jaraq jetkizýdi kúrt arttyrǵan kóbine Baıden ákimshiliginiń arqasynda bolyp otyr, dep jazdy WSJ.
Buǵan deıin Tramp pen Zelenskıı ne týraly sóıleskenin jazǵan bolatynbyz.