Tramp Ýkraınaǵa amerıkalyq qarý jetkiziletinin málimdedi

ASTANA. KAZINFORM — AQSh prezıdenti Donald Tramp NATO men AQSh Ýkraınaǵa qarý jetkizý týraly kelisimge qol jetkizgenin málimdedi, dep jazdy Kazinform agenttiniń menshikti tilshisi. 

Aqparat ABC News saıtynda jaryq kórgen derekke negizdelgen.

AQSh prezıdenti bul málimdemeni Aq úıde NATO Bas hatshysy Mark Rıýttemen kezdesý barysynda jasady. Tramptyń aıtýynsha, «mıllıardtaǵan dollar» turatyn qarý-jaraq AQSh-tyń qorǵanys ónerkásibinde óndirilip, eýropalyq memleketterdiń qarajaty esebinen qarjylandyrylmaq.

— Búgin biz kelisimge keldik: biz olarǵa qarý beremiz, al olar aqysyn tóleıdi. AQSh bul úshin eshqandaı tólem almaıdy. Biz bul qarýdy satyp almaımyz, biraq ózimiz shyǵaramyz, al aqysyn olar tóleıdi, — dedi Aq úı basshysy.

Óz kezeginde NATO Bas hatshysy Mark Rıýtte bul kelisimdi «naǵyz aýqymdy mámile» dep atap, «eýropalyqtar belsendilik tanytyp otyr» dedi.

— Bul Ýkraınaǵa áýe shabýylynan qorǵaný júıelerin, zymyrandar men oq-dárilerdi qamtıtyn úlken kólemdegi áskerı tehnıka alýǵa múmkindik beredi, — dedi Rıýtte.

Sondaı-aq, ol bul kelisimge qosylýǵa nıetti «birqatar eldermen baılanysta» ekenin aıtty.

Buǵan deıin habarlanǵandaı, Tramp NATO bas hatshysymen kezdesýde Reseı men Ýkraına arasyndaǵy qaqtyǵysty retteý boıynsha 50 kún ishinde kelisim jasalmasa, Reseıge qarsy sanktsııa engizetinin eskertken bolatyn.