Tramp Ýkraına men Reseı týraly taǵy málimdeme jasady
ASTANA. KAZINFORM - AQSh prezıdenti Donald Tramp NBC News arnasyna suhbat berdi. Ol úshinshi merzimge saılaýǵa túsýdi josparlamaıtynyn aıtty jáne Ýkraına men Reseı arasyndaǵy beıbit kelisim múmkindigi týraly pikir bildirdi, dep habarlaıdy Euronews.
Ýkraınaǵa beıbitshilik jaqyn ba? Aq úı basshysy NBC News tilshisimen sóılesken kezde Ýkraına men Reseı arasyndaǵy beıbitshilik qol jetimsiz bolýy múmkin dep málimdedi. Degenmen ol kelisimge keletin ýaqyt «jaqyn» bolýy múmkin dep te oılaıdy.
Amerıkalyq kóshbasshy Vashıngtonnyń kelissózden shyǵýy múmkin ekenin taǵy da joqqa shyǵarmady. Biraq kelisimge qol qoıýǵa áli de «óte jaqsy múmkindik» bar ekenin atap ótti.
Buryn habarlanǵandaı, Vladımır Zelenskıı Vladımır Pýtınniń 7-9 mamyr aralyǵynda úsh kúnge bitim jarııalaý týraly usynysyn qabyldamady.
Sonymen qatar AQSh pen Ýkraına paıdaly qazbalar týraly kelisimge qol qoıdy.
Reseı AQSh-tyń Ýkraına boıynsha kelissózderden shyǵý múmkindigine pikir bildirdi.
Tramp sonymen birge 2028 jyly úshinshi prezıdenttik merzimge saılaýǵa túsýdi josparlamaıtynyn aıtty. Ol qazir vıtse-prezıdent Djeı Dı Vensti respýblıkashyldar atynan kandıdat retinde kóretinin málimdedi.
- Men tórt jyldy jaqsy ótkizip, sodan keıin ony basqa bireýge, eń durysy respýblıkashylǵa, uly respýblıkashylǵa tapsyrýdy asyǵa kútemin... Tórt jyl shynymen de aýyz toltyryp aıtarlyqtaı is atqarý úshin jetkilikti merzim. Bul týraly aıtý áli erte (murager týraly), biraq mende vıtse-prezıdent bar... Djeı Dı keremet jumys istep jatyr, - dedi AQSh prezıdenti.