Tramp ýkraın bosqyndaryna AQSh-ta qalýyna ruqsat berýi múmkin
ASTANA. KAZINFORM — AQSh prezıdenti Donald Tramp ýkraın bosqyndaryna elde soǵys bitkenshe qalýǵa ruqsat berýi múmkin ekenin aıtty. Bul bosqyndar «Ýkraınamen yntymaqtastyq» (Uniting for Ukraine) baǵdarlamasy aıasynda AQSh-ta turyp jatyr, dep jazdy DW.
AQSh prezıdenti Donald Tramp Reseıdiń Ýkraınaǵa qarsy bastaǵan soǵysy aıaqtalǵanǵa deıin ýkraın bosqyndarynyń AQSh-ta qalýyna ruqsat berýi múmkin ekenin málimdedi.
— Biz solaı isteımiz. Bizge Ýkraınadan kóptegen adam keldi, jáne biz olarǵa kómektesip jatyrmyz, — dedi Tramp 30 shilde kúni beısenbide Vashıngtonda DW tilshisiniń suraǵyna jaýap bere otyryp.
Reseıdiń Ýkraınaǵa basyp kirýi 2022 jylǵy aqpanda bastalǵan soń, AQSh «Ýkraınamen yntymaqtastyq» (Uniting for Ukraine / U4U) baǵdarlamasy aıasynda ýkraın azamattaryna elge kirýge múmkindik berdi. Bul baǵdarlama boıynsha ýkraın azamattaryna AQSh-ta demeýshileri (sponsorlary) bolǵan jaǵdaıda kirýge jáne ýaqytsha turýǵa ruqsat beriledi.
Forbes jýrnaly maýsym aıynda habarlaǵandaı, osy baǵdarlama aıasynda 236 myńnan astam demeýshilik ótinim maquldanǵan, al 187 myńnan astam ýkraın azamaty AQSh-qa kelgen.
Alaıda Tramptyń ekinshi prezıdenttik merzimi bastalǵanda, 2025 jylǵy naýryzda, Reuters agenttigine silteme jasaǵan derekkózder AQSh bıligi 2022 jyldan keıin elge kelgen 240 myń ýkraın bosqyndy zańdy mártebesinen aıyrýdy josparlap otyrǵanyn habarlady. Bul aqparatty Aq úı jalǵan dep atady.
2025 jylǵy sáýirde keıbir ýkraın bosqyndaryna AQSh Іshki qaýipsizdik mınıstrliginen elden shyǵýdy suraǵan elektrondy hat kelgen. Keıin mınıstrlik bul hattardyń qatelikpen jiberilgenin málimdedi.
Eske sala keteıik, buǵan deıin Germanııada bosqyndar sany 3,5 mln adamǵa jetkenin jazǵan edik.