Tramp Ýıtkoff pen Pýtınniń kezdesýin ónimdi dep atady

ASTANA. KAZINFORM – AQSh prezıdenti Donald Tramp óziniń arnaıy ókili Stıv Ýıtkofftyń Reseı prezıdenti Vladımır Pýtınmen ótkizgen kezdesýin óte ónimdi boldy dep málimdedi, dep jazdy VVS.

— Meniń arnaıy ókilim Stıv Ýıtkoff Reseı prezıdenti Vladımır Pýtınmen óte ónimdi kezdesý ótkizdi. Aıtarlyqtaı ilgerileýshilikke qol jetkizildi! — dep jazdy Tramp Truth Social áleýmettik jelisindegi paraqshasynda.

Eske salsaq, 6 tamyz kúni Vladımır Pýtın AQSh prezıdentiniń arnaıy ókili Stıven Ýıtkoffty qabyldady. Kezdesý Kremlde ótti.

Pýtınniń kómekshisi ıÝrıı Ýshakov jýrnalısterge bergen suhbatynda bul kezdesýde «ýkraın daǵdarysy» jáne Reseı men AQSh arasyndaǵy strategııalyq áriptestiktiń damý múmkindikteri jaıly paıdaly jáne konstrýktıvti áńgime bolǵanyn aıtty.

Sonymen qatar, Aq úı juma kúni Reseıge qarsy ekinshilik sanktsııalar engizý týraly habarlanýy múmkin ekenin jarııalady.