Tramp túrmege otyrsa da, prezıdent saılaýyna qatysa beredi — advokat

ASTANA. KAZINFORM — Donald Tramptyń advokattarynyń biri Alına Habba BBC-ge suhbat berdi. Onyń aıtýynsha, Tramp Nıý-Iorktegi mańyzdy sot protsesinde kináli dep tanylǵanyna qaramastan Aq úıge  úmitker kúıinde qala beredi.  

Eske salaıyq, beısenbi kúni alqabıler Trampty 2016 jylǵy saılaý naýqany kezinde burynǵy pornojuldyz Stormı Denıelske aqsha tólegenin jasyrý úshin is qujattaryn burmalaǵany úshin kináli dep tapty.

Manhettendegi sot protsesiniń tarıhı máni bar. Tramp — qylmys jasaǵany úshin kináli dep tanylǵan alǵashqy eks-prezıdent.

Oǵan barlyǵy 34 aıyp taǵyldy. Alqabıler ony barlyq epızod boıynsha kináli dep tapty.

Burynǵy prezıdentke úkim 11 shildede shyǵady. Ony osy sotqa tóraǵalyq etken sýdıa Hýan Merchan shyǵarady.

Eks-prezıdenttiń sot sheshimine apellıatsııalyq shaǵym beretini anyq.  

Tramptyń advokaty Alına Habba VVS-ge bergen suhbatynda burynǵy prezıdenttiń saıası qýdalaýdyń qurbany bolǵanyn jetkizdi. 

Habbanyń aıtýynsha, Tramp túrmege otyrsa da, qarasha aıynda ótetin AQSh prezıdent saılaýyna qatysady. 

«Ashyǵyn aıtqanda, elimizdiń sot júıesinde eshqashan bolmaǵan jemqorlyqty kórdik, — deıdi Habba. — Bul asyra silteý emes, óte naqty, 100 paıyz aşy shyndyq, bul problemany sheshý úshin elimiz bıylǵy qarashada birjola durys sheshim qabyldaýǵa tıis».   

Aıtýynsha, Tramp — prezıdenttikke kandıdat bolyp qala beredi, sot úkimi muny esh ózgerte almaıdy. 

«Bizdiń azamattarǵa bul qajet, óıtkeni, shynyn aıtqanda, bul el oılaǵannan da mańyzdy. Halyq pikirin ashyq bildirip, az da bolsa kómegin berip jatyr, olar qoryqsa da, únsiz qalmaı úles qosyp otyr, sondyqtan mundaı sumdyqqa jol berip, qol qýsyryp qarap tura almaımyz», — deıdi advokat.