Tramp: «Trump card» alýǵa 15 myńnan asa sheteldik ótinish berdi

ASTANA. KAZINFORM — AQSh-tyń jańa turǵylyqty turý ruqsaty — «Trump card» dep atalatyn kartany alýǵa 15 myńnan asa shetel azamaty nıet bildirdi, dep jazady TASS.

AQSh bıligi olardyń esebinen bıýdjetke 75 mıllıard dollar túsiremiz dep úmittenip otyr. Bul týraly AQSh prezıdenti Donald Tramp málimdedi.

— Keshe keshkisin Trump card alý úshin ótinish berý saıty iske qosylǵannan keıin 15 myńnan astam adam tirkelip, kútý tizimine qosyldy. Bul — bıýdjetimizdi teńgerip, Amerıkany nyǵaıtýǵa jumsalatyn 75 mıllıard dollar, — dedi AQSh prezıdenti Truth Social jelisinde.

Trump card alý júıesi áli jumys istemeıdi. Tıisinshe, AQSh úkimeti ázirge mundaı tólemderdi qabyldap jatqan joq.

AQSh prezıdenti naýryz aıynda Fox News telearnasyna bergen suhbatynda bul jańa turý ruqsaty túriniń «Trump card» dep atalýy múmkin ekenin aıtqan bolatyn (aǵylshyn tilindegi «trump card» tirkesi karta oıyndarynda «kózir karta» degendi bildiredi). AQSh ákimshiliginiń basshysy bul kartalardy satýdan túsetin barlyq qarajat AQSh-tyń 36 trıllıon dollardan asqan astronomııalyq memlekettik qaryzyn azaıtýǵa jumsalatynyn atap ótti.

Prezıdenttiń aıtýynsha, bul turý ruqsaty 5 mıllıon dollarǵa satylmaq.

— Aıtalyq, biz olardy 1 mıllıon dana sattyq delik. Bul — 5 trıllıon dollar, — dedi Aq úı ıesi.

Sondaı-aq, Tramp AQSh bıligi bul kartalardy satyp alatyn sheteldikterge qatysty qandaı da bir eleýli shaǵym aıtsa, aqshalary qaıtarylyp, olardyń óz eline deportatsııalanatynyn eskertti. Árıne, bul kartany satyp alǵysy keletinder AQSh arnaıy qyzmetteri tarapynan «tıisti tekseristen» ótetinin de aıtty.

Bul jańa karta sheteldik ınvestorlarǵa AQSh-ta turýǵa ruqsat beretin EB-5 baǵdarlamasynyń ornyn baspaq.

Budan buryn habarlanǵandaı, AQSh-tyń apellıatsııalyq soty Donald Tramptyń Associated Press (AP) agenttiginiń jýrnalısterin Aq úı men prezıdenttik ushaqqa ýaqytsha kirgizbeýine ruqsat berdi.