Tramp Toqaevty G20 sammıtine qatysý úshin Maıamıde kútedi — AQSh kongressmeni
ASTANA. KAZINFORM — Amerıkalyq delegatsııany bastap kelgen kongressmen Djeıson Smıt arnaıy qabyldaǵany úshin Qasym-Jomart Toqaevqa alǵys aıtyp, AQSh Prezıdentiniń sálemin jetkizdi. Bul týraly Aqorda málim etti.
— Búgin túngi ekide maǵan Prezıdent Donald Tramp qońyraý shaldy. Men oǵan birneshe saǵattan soń Sizben kezdesetinimdi aıttym. Ol Sizge izgi tilegin joldap, aralaryńyzda qalyptasqan senimdi ári konstrýktıvti qarym-qatynasqa rızashylyǵyn bildirdi. Sonymen qatar Prezıdent Sizdi G20 sammıtine qatysý úshin Maıamıde kútetinin aıtty. Bizdiń saparymyzdyń bir maqsaty — Amerıka Qurama Shtattary men Qazaqstan arasyndaǵy ekonomıkalyq baılanystardy odan ári keńeıtý múmkindikterin zerdeleý. Biz ekijaqty yntymaqtastyqty nyǵaıtý jolynda mazmundy dıalog órbitýge beıilmiz. Prezıdentimiz buǵan aıryqsha mańyz artyp otyr, — dedi Djeıson Smıt.
Kezdesý sońynda Memleket basshysy Maıamıge josparlanǵan aldaǵy sapary Qazaqstan men AQSh arasyndaǵy keńeıtilgen strategııalyq seriktestikke tyń serpin beretinine senim bildirdi.
Eske sala keteıik, Prezıdent Qasym-Jomart Toqaev AQSh Ókilder palatasynyń Bıýdjet jáne salyq jónindegi komıtetiniń tóraǵasy Djeıson Smıtpen, sondaı-aq Kongress músheleri Greg Merfımen, Kerol Mıllermen, Ronnı Djeksonmen, Ýeslı Bellmen jáne Edvard Keıspen kezdesti.
