Tramp: TikTok úshin baj salyǵyn jeńildetýge daıynmyn

ASTANA. KAZINFORM – AQSh prezıdenti Donald Tramp 26 naýryz kúni ByteDance kompanııasymen TikTok-ty satý týraly kelisimge kelý úshin Qytaıǵa qarsy engizilgen qosymsha baj salyǵyn tómendetýge daıyn ekenin málimdedi. Bul týraly Lianhe Zaobao  basylymy habarlady.

Talap boıynsha, ByteDance kompanııasy TikTok-ty 5 sáýirge deıin qytaılyq emes satyp alýshyǵa ótkizýi shart. Eger bul shart oryndalmasa, ulttyq qaýipsizdikke qater tóndirýi múmkin degen aıyppen platformaǵa tyıym salynýǵa tıis.

Anyǵynda bul tyıym 2024 jyly qabyldanǵan sheshimge sáıkes, bıylǵy qańtarda kúshine enýge tıis bolatyn.

Sársenbi kúni Tramp jýrnalısterge TikTok-qa qatysty kelisimge qol jetpese, bul merzimdi keıinge shegerýge daıyn ekenin aıtty.

TikTok bul málimdemege qatysty áli pikir bildirgen joq.

Ótken jyly qabyldanǵan normatıvtik qujatqa sáıkes, ByteDance 2025 jyldyń 19 qańtaryna deıin TikTok-tan bas tartýǵa tıis bolatyn. AQSh Joǵarǵy soty bul talapty oryndaý týraly úkim shyǵarǵannan keıin, TikTok qańtar aıynda AQSh-ta jumysyn ýaqytsha toqtatqan. Alaıda, Tramp bılikke oralǵan soń, platforma qaıta iske qosyldy.

Tramp prezıdent bol sala jarlyqqa qol qoıyp, tıisti talaptyń oryndalý merzimin 5 sáýirge deıin keri shegergen. Al ótken aıda ol kelisimge qol jetkizý úshin bul merzimdi odan ári uzartýy múmkin ekenin eskertken.

Eske sala keteıik, buǵan deıin Tramp Microsoft TikTok-ty satyp alýǵa qyzyǵýshylyq tanytyp otyrǵanyn aıtqanyn jazǵan bolatynbyz.