Tramp TikTok-ty buǵattaý merzimin 16 jeltoqsanǵa deıin uzartty
ASTANA.KAZINFORM – AQSh prezıdenti Donald Tramp Qurama Shtattar aýmaǵynda qytaılyq TikTok áleýmettik jelisin buǵattaýdy 16 jeltoqsanǵa deıin keıinge shegerdi, dep habarlaıdy TASS.
Amerıkalyq kóshbasshynyń atqarýshy jarlyǵy Aq úı saıtynda jarııalandy.
Qujatta kórsetilgendeı, atalǵan shegerý «2025 jyldyń 16 jeltoqsanyna deıin uzartyldy». Osy ýaqyt aralyǵynda AQSh bıligi TikTok-ty elde tyıym salynǵan platformaǵa aınaldyratyn zańda kózdelgen sharalardy qabyldamaýy tıis, eger onyń qytaılyq bas kompanııasy ByteDance ony satpasa.
Tramp seısenbi kúni buǵan deıin «óte iri kompanııalar toby» TikTok-ty satyp alǵysy keletinin aıtqan bolatyn. Onyń sózinshe, qytaılyq tarappen bul jóninde kelisim jasalǵan. Sondaı-aq amerıkalyq kóshbasshy 19 qyrkúıekke josparlanǵan QHR tóraǵasy Sı Tszınpınmen telefon arqyly áńgimede mámile sharttaryn túpkilikti bekitetinin atap ótti.
AQSh qarjy mınıstri Skott Bessent dúısenbi kúni Madrıdte qytaılyq resmı tulǵalarmen keńesýden keıin, kelisim aıasynda áleýmettik jeli amerıkalyq bıznes ıeligine ótetinin málimdedi.
The New York Post gazetiniń habarlaýynsha, amerıkandyq qoldanýshylar úshin TikTok jumysyn qamtamasyz etetin, shamamen $50 mlrd dep baǵalanatyn jańa amerıkalyq kompanııa qurylady. Basylym naqtylaǵandaı, jańa kompanııanyń negizgi aktsıonerleri Trampty qoldaıtyn mıllıarder Djeff ıAss pen ınvestıtsııalyq kompanııa General Atlantic jetekshisi Bıll Ford bolady. Al ByteDance jańa kompanııadan 19,9% úleske ıe bolady. Kelisimde Oracle kompanııasynyń basshysy Larrı Ellıson mańyzdy ról oınaıdy, ol jańa kompanııaǵa bultty qyzmetterdi usynýmen aınalysady.
TikTok-ty satý nemese Qurama Shtattar aýmaǵyndaǵy qyzmetin toqtatýǵa mindetteıtin zańdy 2024 jyly AQSh-tyń 46-shy prezıdenti Djo Baıden qol qoıǵan bolatyn.
Tramp bul platformaǵa «jyly qaraıtynyn», sebebi onyń paıdalanýshylarynyń daýystary prezıdenttik saılaýdaǵy jeńisine yqpal etkenin aıtqan edi. 2025 jylǵy 20 qańtardaǵy ınaýgýratsııasynan keıin ol AQSh-ta TikTok-qa tyıymdy keıinge qaldyrý týraly jarlyqqa qol qoıdy. Keıin bul merzimdi birneshe ret uzartqan bolatyn.