Tramp TikTok-qa tyıym salýdy keıinge qaldyrdy
ASTANA. KAZINFORM - Donald Tramp AQSh-ta TikTok-qa tyıym salýdy talap etetin zańnyń oryndalýyn 75 kúnge keıinge qaldyratyn jarlyqqa qol qoıdy.
- Bul shara Tramp ákimshiligine mıllıondaǵan amerıkalyqtar qoldanatyn qarym-qatynas platformasyn birden jaýyp tastamaı, ulttyq qaýipsizdikti qamtamasyz etetin is-áreket baǵytyn aıqyndaýǵa múmkindik beredi, - delingen buıryqta.
Buǵan deıin TikTok AQSh-taǵy 170 mıllıon paıdalanýshyǵa qyzmetin qaıta bastady, óıtkeni bir kún buryn Donald Tramp TikTok-qa 90 kúndik jeńildik berýge nıetti ekenin jáne ınaýgýratsııadan keıin tıisti habarlama jasaıtynyn málimdedi.
Inaýgýratsııada sóılegen sózinde Tramp ımmıgratsııa men ekonomıkaǵa nazar aýdaratyn «atqarýshy buıryqtar serııasyna» qol qoıatynyn jáne «ońtústik shekarada ulttyq tótenshe jaǵdaı» jarııalaıtynyn aıtty.
Osyǵan deıin AQSh Dúnıejúzilik densaýlyq saqtaý uıymynan shyqqany týraly habarladyq.