Tramp TikTok-qa oralyp, platformany «saqtap qalǵanyn» málimdedi
ASTANA.KAZINFORM - AQSh prezıdenti Donald Tramp TikTok áleýmettik jelisinde jańa beınejazba jarııalap, óziniń arqasynda platforma jumys istep turǵanyn aıtty, dep habarlaıdy Kazinform agenttiginiń menshikti tilshisi.
- Barlyq jas TikTok qoldanýshylar, men TikTok-ty saqtap qaldym. Sondyqtan maǵan qaryzdarsyńdar, - dedi Tramp vıdeoda.
Ol vıdeoda jastardyń ony qazir Aq úıden kóretinin, bir kúni olardyń biri sol jerde otyryp tamasha jumys isteıtinin aıtty.
Bul Donald Tramptyń 2024 jylǵy saılaýdan keıin TikTok-qa birinshi ret oralýy, ol platformada bir jylǵa jýyq ýaqyt bolmady.
Esterińizge sala keteıik, qyrkúıek aıynyń sońynda AQSh prezıdenti Donald Tramp pen Qytaı tóraǵasy Sı Tszınpın TikTok boıynsha kelisim jasap, kezdesý belgilegen bolatyn.
Buǵan deıin Aq úı TikTok akkaýntyn ashqanyn habarlaǵan edik.