Tramp The New York Times gazetin jala japty dep sotqa berdi

ASTANA. KAZINFORM – AQSh prezıdenti Donald Tramptyń aıtýynsha, The New York Times – el tarıhyndaǵy eń nashar jáne eń azǵyn gazetterdiń biri.

Bul týraly amerıkalyq kóshbasshy Truth Social-daǵy paraqshasynda habarlady.

- Búgin men Radıkaldy solshyl demokratııalyq partııanyń is júzinde daýys zoraıtqysh quralyna aınalǵan bizdiń el tarıhyndaǵy eń nashar jáne azǵyndaǵan gazetterdiń biri The New York Times gazetine qarsy jala jabý jáne qorlaý boıynsha 15 mlrd dollar óndirip alý úshin sotqa shaǵymdaný qurmetine ıe boldym, - dep jazdy ol.

Aq úı basshysy basylymdy 2024 jylǵy prezıdenttik saılaýda onyń qarsylasy, sol kezdegi vıtse-prezıdent Kamala Harrısti ashyq qoldady, sondaı-aq ony jáne onyń otbasy músheleri men aınalasyndaǵylarǵa jala japty dep aıyptady.

- Basylym ondaǵan jyldar boıy sizdiń súıikti prezıdentińiz (men!), meniń otbasym, bıznesim, «Amerıka birinshi kezekte» qozǵalysy, MAGA jáne bizdiń elimiz týraly ótirik aıtyp keledi. Men jalǵan jańalyqtar jelileri sııaqty bir kezderi qurmetke ıe bolǵan osy «gazetti» jaýapqa tartyp otyrǵanymdy maqtan tutamyn, - dep qosty Tramp.

Eske sala ketsek, ótken jyldyń sońynda Tramp sot arqyly ABC News telearnasynan 15 mıllıon dollar óndirip aldy.

Buǵan deıin AQSh prezıdenti Donald Tramp Wall Street Journal gazetiniń baspageri, medıamagnat Rýpert Merdokqa jáne jýrnalısterge Djeffrı Epshteınge arnalǵan ashyqhat týraly maqalaǵa baılanysty jala japqanyn aıtyp, sotqa berdi.