Tramp tehnıkalyq aqaýǵa baılanysty Ulybrıtanııada basqa tikushaqqa otyrýǵa májbúr boldy

ASTANA. KAZINFORM – AQSh prezıdenti Donald Tramp mingen tikushaq Lýton áýejaıyna shuǵyl qondy, dep habarlaıdy VVS. 

Aq úıdiń baspasóz hatshysy Kerolaın Lıvıttiń habarlaýynsha, tikushaq «gıdravlıkanyń azdaǵan aqaýyna baılanysty» jergilikti aerodromǵa qondy, sodan keıin Stensted áýejaıyna shamamen 20 mınýt keshigip keldi.

Ol bul sheshimniń «erekshe saqtyq maqsatynda» qabyldanǵanyn aıtyp, prezıdent pen birinshi hanymnyń «rezervtik tikushaqqa aman-esen mingenin» qosyp ótti.

Oqıǵa Tramp Ulybrıtanııa premer-mınıstri Kır Starmermen birlesken baspasóz máslıhatyn ótkizip jatqan Chekerstegi rezıdentsııasynan Stensted áýejaıyna ushyp bara jatqan kezde boldy.

Buǵan deıin AQSh prezıdenti Donald Tramptyń Ulybrıtanııaǵa memlekettik sapary aıasynda jasandy ıntellekt, kvanttyq esepteýler jáne ıadrolyq energetıka salalarynda tehnologııalyq áriptestik týraly kóp mıllıardtyq kelisimge qol qoıylǵanyn jazǵan bolatynbyz.

Ulybrıtanııa Trampqa aıryqsha saltanatty qurmet kórsetkenin myna jerden oqı alasyz.