Tramp Taıaý Shyǵystaǵy jaǵdaıǵa baılanysty Qytaıǵa saparyn keıinge qaldyrdy
ASTANA. KAZINFORM — AQSh prezıdenti Donald Tramp Beıjińge saparyn jáne Qytaı tóraǵasy Sı Tszınpınmen sáýir aıynyń basyna josparlanǵan kezdesýin bir aıǵa shegerýdi suraǵanyn málimdedi, dep habarlaıdy VVS.
Amerıkalyq kóshbasshynyń aıtýynsha, bul sheshim Taıaý Shyǵystaǵy jaǵdaıǵa baılanysty shyǵarylǵan.
— Biz Qytaımen kelissózder júrgizip jatyrmyz. Meniń oıymsha, qaqtyǵysqa baılanysty osynda bolýym kerek. Sondyqtan kezdesýdi bir aıǵa shegerýdi ótindik, — dedi Tramp.
BAQ ókilderiniń suraqtaryna jaýap bergen Tramp áskerı operatsııanyń osy aptada aıaqtalýy ekitalaı dep atap ótti.
Eske sala keteıik, qańtar aıynda Donald Tramp Qytaıǵa bıylǵy jyldyń sáýir aıynda baratynyn aıtyp, buryn jarııalanǵan josparyn rastaǵan bolatyn.
AQSh-tyń Qarjy mınıstri Skott Bessent buǵan deıin Donald Tramp pen Sı Tszınpın 2026 jyly tórt ret kezdesýi múmkin dep boljaǵan. Ol eki memlekettik sapardan bólek, Florıda shtatyndaǵy Doral qalasynda ótetin G20 sammıtinde, sondaı-aq Qytaıdyń Shenchjen qalasynda ótetin Azııa-Tynyq muhıty ekonomıkalyq yntymaqtastyǵy forýmy aıasynda kelissózder júrgizilýi múmkin ekenin atap ótti.
