Tramp Taıaý Shyǵystaǵy jaǵdaıǵa baılanysty G7 sammıtinen erte ketip qaldy

ASTANA. KAZINFORM – Donald Tramp Tegeran turǵyndarynyń shuǵyl evakýatsııasy jónindegi tvıtinen kóp uzamaı, onyń baspasóz hatshysy da dál sondaı ádispen habarlama taratyp, prezıdenttiń Kanadada ótip jatqan «Úlken jetilik» sammıtinen merziminen buryn ketetinin málimdedi. Sebep retinde «birqatar mańyzdy istermen aınalysý qajettigi» aıtylǵan, dep jazdy BBC.

– Taıaý Shyǵysta bolyp jatqan oqıǵalarǵa baılanysty prezıdent Tramp memleket basshylarymen keshki astan keıin búgin sammıtten ketedi, – dep jazdy Aq úıdiń baspasóz hatshysy Kerolaın Lıvıtt X áleýmettik jelisinde (burynǵy Twitter).

G7 sammıti ótip jatqan Kanadanyń batysyndaǵy Kananaskıs qalasynda bul ýaqytta shamamen keshki alty shamasy bolatyn.

Buǵan deıin habarlanǵandaı, AQSh prezıdenti Donald Tramp TruthSocial jelisinde jarııalaǵan jazbasynda Tegerandaǵy barlyq turǵyndardy shuǵyl túrde evakýatsııalanýǵa shaqyrdy.

Oǵan deıin ol Izraıl men Iran arasynda beıbitshilik ornatýǵa ýáde bergen edi.