Tramp tarıfterge baılanysty 500 mıllıon dollar joǵaltty

ASTANA. KAZINFORM – Tramptyń tarıfteri qor bırjalaryn quldyratyp jiberdi, sondaı-aq onyń jeke tabysyna da qatty áser etti, dep jazady DW.

AQSh prezıdenti Donald Tramp engizgen ımporttyq baj salyǵyna baılanysty onyń jeke baılyǵy 500 mıllıon dollarǵa qysqardy, dep esepteıdi Forbes jýrnalısteri. Basylym tarıf kóterilgen kúni, ıaǵnı 2 sáýirde Tramptyń taza baılyǵy 4,7 mıllıard dollarǵa baǵalanǵanyn, biraq bir apta ótpeı jatyp, 8 sáýirde onyń quny shamamen 4,2 mıllıard dollarǵa deıin tómendegenin jazdy.

Aq úı basshysy Trump Media and Technology Group aktsııalarynyń qunynyń tómendeýine baılanysty shamamen 170 mıllıon dollar joǵaltty. Qalǵan shyǵyndar kommertsııalyq jyljymaıtyn múlik (90 mıllıon), golf bıznesi (shamamen 70 mıllıon), qonaq úı men kýrorttyq bıznes (65 mıllıon), krıptovalıýta jáne Tramptyń bıznesi nemese ınvestıtsııasy bolǵan basqa da salalar qunynyń tómendeýine baılanysty.

Ilon Mask bir aptada ondaǵan mıllıard dollar joǵaltty

Donald Tramptyń odaqtasy, mıllıarder Ilon Mask te respýblıkashyldardyń ekonomıkalyq saıasatynan zardap shekti: Space X basshysynyń baılyǵy 2 sáýirden bastap 35 mıllıard dollarǵa qysqardy, al 8 sáýirde ol 298 mıllıard dollarǵa baǵalandy (Bloomberg 9 sáýirdegi jaǵdaı boıynsha ol qazirdiń ózinde 290 mıllıard dollar bolǵanyn málimdedi).

Sonymen birge, The Washington Post basylymynyń jazýynsha, Mask Tramptan tarıfterdi engizbeýdi suraǵan, biraq onyń áreketi sátsiz aıaqtaldy.

Aıta keteıik, Bloomberg málimetinshe, AQSh prezıdenti Donald Tramp jańa kedendik baj salyǵyn engizetinin jarııalaǵannan keıin bir kúnde ǵalamshardaǵy eń baı 500 adamnyń jalpy baılyǵy 208 mlrd dollarǵa qysqardy.