Tramp Taıland pen Kambodja premerleriniń kezdesýge keliskenin málimdedi

ASTANA. KAZINFORM — Taıland premer-mınıstriniń mindetin atqarýshy Phýmtam Vechaıachaı men Kambodja premer-mınıstri Hýn Manet eki el arasyndaǵy qaqtyǵysty retteý maqsatynda kezdesý ótkizýge daıyn ekenin jetkizdi. Bul týraly AQSh prezıdenti Donald Tramp málimdedi, dep habarlaıdy DW.

«Olar shuǵyl kezdesip, atysty toqtatý josparyn tez ázirleýge kelisti», – dep jazdy Tramp Truth Social jelisinde eki eldiń úkimet basshylarymen telefon arqyly sóılesken soń.

AQSh prezıdenti AQSh-tyń bul eldermen saýda qarym-qatynasy bar ekenin, alaıda qaqtyǵys jalǵasyp jatqan jaǵdaıda eshbir tarappen saýda kelisimi jasalmaıtynyn atap ótti.

«Biz eki elmen de saýda jasaımyz, biraq olar soǵysyp jatqanda eshqandaı mámile jasamaımyz. Men kúrdeli jaǵdaıdy jeńildetýge tyrysyp otyrmyn. Bul soǵysta kóptegen adam qaza taýyp jatyr», – dedi ol.

Tramptyń aıtýynsha, taraptar beıbit kelisimge kelgen jaǵdaıda, AQSh saýda qatynastaryn qaıta jandandyrýǵa ázir.

Buǵan deıin Kambodja men Taıland BUU Qaýipsizdik Keńesiniń otyrysynda ózara talaptarymen almasty.

Aıta keteıik, 23 shildede shekara mańynda mına jarylysy bolyp, taılandtyq sarbazdar jaralandy. Al kelesi kúni shekarada atys bolyp, beıbit turǵyndar arasynda qaza tapqandar bar.