Tramp Stıven Mırandy Ekonomıkalyq keńes tóraǵasy laýazymyna usyndy

ASTANA. KAZINFORM – Jańadan saılanǵan prezıdent Donald Tramp jeksenbide óziniń birinshi ákimshiliginde qazynashylyq departamentiniń keńesshisi bolǵan Stıven Mırandy Ekonomıkalyq keńes tóraǵasy laýazymyna usynǵanyn málimdedi, dep habarlaıdy Amerıka daýysy. 

Keńes prezıdentke ekonomıkalyq saıasat máseleleri boıynsha keńes beredi jáne tóraǵany qosqanda úsh músheden turady. Keńes el ekonomıkasyna sholý jasaıtyn, federaldyq saıasattar men baǵdarlamalardy qarastyratyn jáne ekonomıkalyq saıasat boıynsha usynystar jasaıtyn jyl saıynǵy esepti daıyndaýǵa kómektesedi.

Bıyl Mıran jáne ekonomıst Nýrıel Rýbını hedj-qordy zertteýdiń avtorlary boldy, zertteýde ótken jyly Qarjy mınıstrliginiń ekonomıkalyq yntalandyrý sharasy retinde uzaq merzimdi oblıgatsııalardy satýdy qysqartý tıimdi bolǵany atap ótilgen.

Buǵan deıin Tramp óziniń bolashaq ákimshiligine alǵashqy taǵaıyndaýlardy jarııalaǵan bolatyn. Sodan keıin ol Pentagon basshylaryn atady. Al Maskqa úkimettiń tıimdilik departamentin basqarýdy usyndy. 

Ol sondaı-aq Densaýlyq saqtaý mınıstrliginiń basshysy laýazymyna kishi Kennedıdiń kandıdatýrasyn usyndy.

AQSh Memlekettik departamenti men Ulttyq barlaý basqarmasynyń basshylaryn jáne Aqúıdiń jańa baspasóz hatshysyn taǵaıyndady.

Sonymen qatar, Tramp AQSh-tyń Energetıka mınıstri laýazymyna Liberty Energy munaı kompanııasynyń basshysyn tańdady. 

Donald Tramp óziniń burynǵy ekonomıkalyq keńesshisi Kevın Hassetti Aq úıdiń Ulttyq ekonomıkalyq keńesiniń basshylyǵyna usyndy.

Ol sondaı-aq mıllıarder Skott Bessentti Qarjy mınıstri laýazymyna usyndy.

Tramp otstavkadaǵy general-leıtenant Kıt Kellogti Ýkraına men Reseı boıynsha arnaıy ókil etip taǵaıyndaǵanyn málimdedi.

Donald Tramp lıvandyq mıllıarder-bıznesmen Massad Býlosty arab jáne Taıaý Shyǵys isteri boıynsha aǵa keńesshi qyzmetine taǵaıyndamaqshy.