Tramp sóz sóıler aldynda Vashıngtonda evakýatsııa jarııalandy
ASTANA. KAZINFORM – AQSh táýelsizdiginiń 250 jyldyǵyna arnalǵan Vashıngtondaǵy merekelik is-sharalardyń ótýine qatty naızaǵaıdan qaýip tóndi. Prezıdent Donald Tramptyń Ulttyq alleıadaǵy sóz sóıleýine birneshe saǵat qalǵanda uıymdastyrýshylar kelýshilerdi evakýatsııalap, merekelik baǵdarlamany ýaqytsha toqtatty, dep habarlaıdy Associated Press.
Qatysýshylarǵa jaqyn mańdaǵy murajaılarǵa, federaldyq ǵımarattarǵa jáne metro stantsııalaryna panalaý usynyldy. AQSh-tyń Qupııa qyzmeti de is-shara bastalǵanǵa deıin baqylaý-ótkizý beketterin ýaqytsha japty.
El astanasyndaǵy qolaısyz aýa raıyna qaramastan, AQSh-tyń basqa qalalarynda merekelik sharalar jalǵasty. Nıý-Iorkte Azattyq músininiń mańynda 43 jelkendi jáne áskerı kemeniń sherýi ótti. Odan keıin Blue Angels pılotaj toby men Frantsııanyń Patrouille de France avıatsııalyq tobynyń qatysýymen áýe shoýy uıymdastyryldy.
Al osydan 250 jyl buryn Táýelsizdik deklaratsııasy qabyldanǵan Fıladelfııada aptap ystyqqa qaramastan merekelik is-sharalar ótkizildi.
Mereıtoıǵa daıyndyq birneshe aıǵa sozylǵan. Alaıda AQSh-tyń shyǵys jaǵalaýynyń edáýir bóligin qamtyǵan anomaldy ystyqqa baılanysty birqatar qalada uıymdastyrýshylar merekelik baǵdarlamany ózgertýge májbúr boldy.
Mereke eldegi saıası kózqarastardyń aıqyn jiktelýi aıasynda ótip jatyr. Bir kún buryn Donald Tramp Rashmor taýynyń janyndaǵy sózinde kommýnızmdi «amerıkalyq erkindikke tóngen ólim qaýpi» dep atady. Al Táýelsizdik kúni AQSh vıtse-prezıdenti Djeı Dı Vens eldi synaýshylar onyń jetistikteri emes, kemshilikteri týraly aıtatynyn málimdedi.
– Olar sizderdi Amerıkany álsizder kúshtilerge qarsy kúresýge májbúr bolatyn kezekti el ǵana dep sendirýge tyrysady, – dedi Vens.
Eske sala ketsek, buǵan deıin Qazaqstan Prezıdenti Qasym-Jomart Toqaev AQSh prezıdenti Donald Trampty Amerıka Qurama Shtattarynyń táýelsizdiginiń 250 jyldyǵymen quttyqtady.
Al táýelsizdik jarııalaǵanyna 250 jyl bolǵan AQSh-tyń álemdik saıasattaǵy yqpaly qalaı ózgergenin myna jerden oqyńyz.
