Tramp Soltústik Irlandııa men Irlandııanyń «túptiń túbinde» birigetinin aıtty

Tramp pen Irlandııa premer-mınıstri Maıkl Martın Irlandııa astanasy Dýblınde ekijaqty kezdesý bastalar aldynda jýrnalısterge málimdeme jasady.

Martın eki el arasyndaǵy qarym-qatynastyń berik ári tarıhı baılanystarǵa negizdelgenin atap ótip, Tramptar otbasynyń Irlandııanyń Dýonbeg óńirine salǵan ınvestıtsııasy 350 adamdy jumyspen qamtýǵa múmkindik bergenin aıtty.

Martın Tramptyń Irlandııaǵa «Irish Open» golf týrnırine qatysý úshin kelgenin atap ótip, AQSh-ta Irlandııadan shyqqan adamdardyń kóp ekenin de aıtty.

«Bul jaqynda aıaqtalady»

Tramp týrnırdi álemdegi eń mańyzdy sharalardyń biri dep atap, eki el arasyndaǵy qarym-qatynas tarıhtaǵy eń joǵary deńgeıde ekenin aıtty.

Jýrnalısterdiń «Iranmen soǵys qashan aıaqtalady?» degen suraǵyna Tramp: «Menińshe, ol jaqynda aıaqtalady», — dep jaýap berdi.

Onyń aıtýynsha, Irannyń ıadrolyq qarýǵa ıe bolýyna sanaýly apta ǵana qalǵan. Bul jaǵdaı «Izraıl men Taıaý Shyǵysty jaryp jiberýi múmkin».

— Biz órtti sóndirdik. Olar ıadrolyq qarýǵa ıe bola almaıdy, — dedi Tramp.

AQSh-tyń Gazadaǵy genotsıd pen Batys jaǵalaýdy Izraıldiń basyp alýyn qoldap otyr degen aıyptaýlarǵa jaýap bergen Tramp: «(Gazada) biz órtti sóndirip, barlyq tutqyndy qutqardyq», — dep jaýap qatty.

«Ol kezde Anglııa basqa el edi»

Tramp sońǵy ýaqytta Argentına men Anglııa arasynda Folklend araldaryna qatysty qaıta órshigen daý týraly da pikir bildirdi.

— Jas kezimde Folklend soǵysy týraly estidim. Biraq ol kezde Anglııa basqa el edi. Olar araldardy qaıtaryp aldy. Qazir muny isteı alatynyna senimdi emespin. Olarda kóshi-qon jáne energetıka máseleleri bar. Araldarǵa alańdaıtyndaı olardyń problemasy tym kóp. Qaıtadan ol jaqqa barǵysy kele me, bilmeımin. Óıtkeni ol jer shynymen de óte alys. Kememen barýǵa birneshe apta ketedi. Muny yqtımal apat deýge bolady, — dedi AQSh prezıdenti.

Soltústik Irlandııa men Irlandııa Respýblıkasynyń birigýi týraly suraqqa Tramp: «Men másele týyndatqym kelmeıdi, biraq olardyń birigýin kórgim keledi. Meniń eki tarapta da dostarym bar, — dedi ol.

Tramp ırlandııalyqtardyń «jaman adamdar emes» ekenin aıtyp: «Olardyń birigýin kórý keremet bolar edi. Túptiń túbinde olar birigedi. Menińshe, bul aqyr sońynda bolady. Eger solaı bolsa, keremet bolar edi», — dedi.

AQSh prezıdenti Kanada men AQSh arasyndaǵy saýda kelisimine jaqyn arada qol qoıylatynyn da málimdedi.

— Kanada bul kelisimdi qatty qalaıdy. Iran da kelisim jasaýdy qatty qalaıdy. Kanada bizdiń fermerlerimizge jaqsy qaraýy kerek, — dedi Tramp.

Budan buryn Donald Tramp AQSh pen Iran arasyndaǵy soǵys 2026 jylǵy 3 qarashadaǵy Kongress saılaýyna deıin aıaqtalýy múmkin ekenin aıtty.