Tramp Sırııaǵa salynǵan sanktsııalardy alyp tastady

ASTANA. KAZINFORM – AQSh kóshbasshysynyń aıtýynsha, ol osyndaı sheshimdi Saýd Arabııasynyń murager hanzadasy Muhammed ben Salmanmen jáne Túrkııa prezıdenti Rejep Taıyp Erdoǵanmen Sırııadaǵy jaǵdaıdy talqylaǵan soń qabyldady, dep habarlaıdy Euronews.

BAQ málimetinshe, Tramp Parsy shyǵanaǵy men AQSh sammıti ótetin Er-Rııadta Sırııanyń ýaqytsha prezıdenti Ahmed ash-Sharaamen jeke kezdesýi múmkin. Kezdesý áli rastalǵan joq, biraq aqparat kózderiniń dereginshe, 45 mınýttyq kelissóz josparlanǵan.

Sanktsııalardy alyp tastaý – ash-Sharanyń basty basymdyǵy. Ol Sırııanyń jańa úkimeti ekonomıkalyq qysymdy azaıtyp, Batyspen qarym-qatynasty jaqsartqysy keletinin kórsetpek.

Tramp buǵan deıin AQSh «Sırııaǵa múmkindik berý» úshin sanktsııalardy alyp tastaýdy qarastyryp jatqanyn málimdegen. Damaskide buny «halyqtyń azaptan qutylý múmkindigi» retinde qabyldandy.

Saýd Arabııasynyń róli

Sırııa Saýd Arabııasynyń Qurama Shtattarmen qarym-qatynasty qalpyna keltirýde deldal retinde áreket etetinin rastady.

Dıplomattardyń pikirinshe, kóshbasshylardyń yqtımal kezdesýiniń sátti bolýy saýdtyqtarǵa baılanysty bolady.

Batys dıplomattarynyń aıtýynsha, Iordanııa, Saýd Arabııasy jáne Túrkııa Sırııadaǵy turaqtylyqty qalpyna keltirýge múddeli.

Damask usynysy

Reuters agenttigi habarlaǵandaı, Sırııa AQSh-qa kelissózdi bastaýdy usynǵan. Yqtımal qadamdar arasynda Damaskide «Tramp munarasynyń» qurylysyna ruqsat berý, Izraılmen qarym-qatynasty jaqsartý jáne AQSh-tyń Sırııa munaıy men gazyna qol jetkizýine ruqsat berý bar.

Eger Tramp pen ash-Shaaranyń kezdesýi ótse, bul AQSh pen Sırııa arasyndaǵy qarym-qatynasta ózgeristi kezeń bolýy múmkin. Degenmen, kóp nárse eki jaqtyń ymyraǵa kelýge daıyndyǵyna baılanysty bolady.

Osyǵan deıin Ulybrıtanııa Sırııanyń kúshtik qurylymdaryna salynǵan sanktsııalardy alyp tastaǵanyn jazdyq.