Tramp Sırııada atysty toqtatý kelisiminiń oryndalyp jatqandyǵyn málim etti
«Atysty toqtatý týraly sırııalyq kelisim saqtalyp otyrǵan syndy. Kóptegen ómirler saqtalýy múmkin. Kezdesýdiń nátıjesi. Jaqsy!», - dep jazdy Tramp Tvıtterde.
Buǵan deıin habarlaǵanymyzdaı, 8 shilde kúni Gambýrgte ótken G20 sammıti sheńberinde RF Prezıdenti Vladımır Pýtın AQSh Prezıdenti Donald Tramppen Ýkraına men Sırııadaǵy jaǵdaıdy, sondaı-aq terrorızmmen, kıberqylmyspen kúres jáne kıberqaýipsizdik máselelerin talqylaǵan bolatyn.
Reseı men AQSh kóshbasshylarynyń áńgimesi 2 saǵat 15 mınýtqa sozyldy. Bul prezıdentterdiń alǵashqy jeke kezdesýi, buǵan deıin olar tek telefon arqyly áńgimelesken.
Eske salsaq, 4 mamyr kúni Sırııa máselesin retteý jónindegi Astana protsesi barysynda kepilger elder Reseı, Iran jáne Túrkııa Sırııa aýmaǵynda tórt deeskalatsııa aımaǵyn qurý týraly ýaǵdalasty . Naqtyraq aıtqanda, Latakııa provıntsııasynyń jekelegen aımaqtarynda, Alepponyń birqatar óńirlerinde, Hama provıntsııasynda, Homs, Damask/Shyǵys Gýta provıntsııalarynyń jekelegen bólikterinde jáne Deraa men Kýneıtranyń birqatar aýmaqtaryn qamtıtyn óńirlerde qaýipsizdik aımaǵyn qalyptastyrý týraly memorandýmǵa qol qoıyldy.
4-5 shilde kúni elordada Sırııa boıynsha kelissózderdiń kezekti raýndy ótti. Joǵary deńgeıdegi 5-shi halyqaralyq kezdesýdiń qorytyndysy boıynsha kepilger elder Reseı, Túrkııa jáne Iran birlesken málimdeme qabyldady .
«Janjaldy BUU Qaýipsizdik Keńesiniń 2254-qararyn oryndaý negizinde saıası jolmen ǵana sheshýge bolady», - delingen málimdemede.
Sonymen qatar kepilger elder Sırııadaǵy zorlyq-zombylyqtyń aıtarlyqtaı tómendegendigin quptaıtyndyǵyn jáne taraptardy soǵysty toqtatý rejimin saqtaýǵa shaqyratyndyǵy aıtylǵan.
«Deeskalatsııa aýmaǵy shekarasyn anyqtaýdaǵy progreske qanaǵattanýshylyq tanytamyz jáne birlesken jumys tobyna barlyq deeskalatsııa aımaqtarynyń operatsııalyq jáne tehnıkalyq sharttaryn sońyna deıin jasaýdy tapsyrdyq», - delingen QR Syrtqy ister mınıstri Qaırat Ábdirahmanov oqyp bergen birlesken málimdemede.
Birlesken jumys tobynyń kelesi otyrysy 1-2 tamyz aralyǵynda Iranda ótetin bolady.
