Tramp: Signal daýyna baılanysty sheneýnikterdi jumystan shyǵarmaımyn

ASTANA. KAZINFORM — Tramp jalǵan aqparatqa baılanysty eshqandaı sheneýnik jumystan shyǵarylmaıtynyn aıtty, dep jazady Rıa novostı Nbcnews-ke silteme jasap. 

AQSh prezıdenti Donald Tramp Signal messendjerinde áskerı qupııa josparlardyń talqyǵa túsken daýyna baılanysty ákimshilik quzyryndaǵy sheneýnikterin jumystan bosatatyn nıeti joq ekenin aıtty.

Chattaǵy áńgimeden keıin amerıkalyq BAQ-tar Aq úıdiń ulttyq qaýipsizdik jónindegi keńesshisi Maık Valtsty otstavkaǵa ketedi dep boljady. Osy daýdan keıin Tramptyń kóńili qaldy degen sarynda anonımdi derekkózderge silteme jasalǵan aqparatty jarysa taratty. Alaıda, AQSh prezıdenti óz komandasyna senimin joǵaltpaǵanyn aıtyp, ákimshilik sheneýnikteri chatta qupııa aqparat almasty degen qaýesetti joqqa shyǵardy.

Tramp NBC arnasyna bergen suhbatynda: «Men jumysshylarymdy jalǵan aqparat úshin jumystan bosatpaımyn», - dedi.

Buǵan qosa, amerıkalyq kóshbasshy Vals pen AQSh qorǵanys mınıstri Pıt Hegsetke áli de senim artatynyn tilge tıek etti.

Eske sala keteıik, buǵan deıin Prezıdent Donald Tramp joǵary ákimshilik sheneýnikteri toptyq chatta qupııa áskerı jospardy talqylaǵan kezde qaýipsizdiktiń tótenshe buzylýyn kishigirim buzýshylyq dep cıpattaıtynyn aıtqan bolatyn.