Tramp Sı Tszınpınnen Iranǵa qarý satpaýyn ótindi
ASTANA. KAZINFORM – AQSh prezıdenti Donald Tramp amerıkalyq Fox Business Channel jańalyqtar arnasyna bergen suhbatynda Qytaı prezıdenti Sı Tszınpınmen Iranǵa qarý satý máselesi boıynsha tikeleı hat almasyp jatqanyn málimdedi, dep habarlaıdy Kazinform.
Amerıkalyq saıasatker Mornings with Maria bıznes-shoýynyń júrgizýshisi Marııa Bartıromomen suhbatynda munaı naryǵynda Iran men Venesýelaǵa qatysty ózgerister, sondaı-aq AQSh-tyń Kýbaǵa qatysty málimdemeleri Qytaı kóshbasshysymen bolatyn aldaǵy kelissózge qalaı áser etýi múmkin degen suraqqa túsinik berdi.
- Meniń oıymsha, bul eshteńe ózgertpeıdi. Oǵan (Sı Tszınpınge – red.) munaı qajet. Bizdiń qarym-qatynasymyz óte jaqsy. Ol maǵan keremet hat jiberdi, - dep atap ótti amerıkalyq kóshbasshy.
Tramp hat almasýdy Vashıngtonnyń Qytaı-Iran áskerı yntymaqtastyǵy týraly habarlamalarǵa qatysty alańdaýshylyǵyn bildirý úshin bastaǵanyn rastady.
- Ol hatyma jaýap berdi. Maǵan Qytaıdyń Iranǵa qarý jetkizip jatqany týraly málimet jetti jáne qazir habarlamalar barlyq jerde bar. Men oǵan muny istemeýin ótinip hat jiberdim.
Jaýabynda ol maǵan mundaı jetkizilimderdi jasamaıtynyna sendirdi, - dep málimdedi Tramp.
Osyǵan deıin Tramp Fox News telearnasyna bergen suhbatynda Vashıngton men Tegeran arasyndaǵy qaqtyǵys aıaqtalýǵa jaqyn dep sanaıtynyn aıtty.
