Tramp saılaýǵa baılanysty Gondýrasty qarjylandyrýdy toqtatamyn dep qorqytty

ASTANA. KAZINFORM – AQSh prezıdenti Donald Tramp Gondýrasta prezıdenttikke kandıdaty jeńiske jetpegen jaǵdaıda Qurama Shtattar Ortalyq Amerıka eline qarajat bólmeıtinin eskertti, dep habarlaıdy Kazinform menshikti tilshisi. 

- Eger Tıto Asfýra Gondýrasta prezıdent saılaýynda jeńiske jetse, biz oǵan úlken qoldaý kórsetemiz, sebebi Qurama Shtattar oǵan, onyń saıasatyna jáne onyń Gondýrastyń uly halqy úshin ne isteıtinine tolyq senedi. Eger ol jeńiske jetpese Qurama Shtattar aqshany bosqa shashpaıdy. Sebebi, ol kim bolsa da, durys tańdalmaǵan kóshbashysy eldi qıyn jaǵdaıǵa ákelýi múmkin. Tıto uly prezıdent bolady, al Qurama Shtattar Gondýrastyń tolyq áleýetine jetýin qamtamasyz etý úshin onymen tyǵyz yntymaqtastyqta jumys isteıdi!, - dep jazdy Donald Tramp bıylǵy jyldyń 29 qarashasynda eldegi saılaý qarsańynda Truth Social-da. 

The New York Times-tiń abarlaýynsha, eskertý Gondýrasta prezıdent saılaýy bastalardan 36 saǵat buryn jasalǵan.

Tramp konservatıvti Ulttyq partııanyń 67 jastaǵy kandıdaty, burynǵy ońshyl mer Nasrı Hýan Asfýra Zablahty (Tıto Asfýra dep tanymal) qoldap otyr, aldyn ala qorytyndylarǵa sáıkes ol ortalyq-ońshyl Lıberaldyq partııadan úmitker, 72 jastaǵy Salvador Nasrallamen teń túsken. 

Dúısenbi kúni tústen keıin bıýlletenderdiń 57%-y sanalǵannan keıin ár kandıdat 40% daýys jınady, olardy tek 515 bıýlleten bólip turǵan. Bıliktegi solshyl Bostandyq jáne qaıta qurý partııasynan kandıdat Rıksı Monkada aıtarlyqtaı artta qalyp otyrdy. 

Gondýras saıasattanýshylarynyń aıtýynsha, eldiń kóptegen turǵyndary bıleýshi solshyl «Lıbre» partııasynan kóńili qalyp, balama izdedi, biraq Asfýra men Nasrallany qodaýshylar bolyp, ekige bólindi.

Tramp Asfýrany qoldap, Nasrallany synap, ony «kommýnıst» dep atady jáne eger onyń kandıdaty jeńilse, Gondýrasqa qoldaý kórsetýden bas tartatynyn aıtyp qorqytty. Onyń pikirleri daýys berý qarsańyndaǵy kúnderi jańalyqtarda keńinen jarııalandy.

Tramp óziniń onlaın jazbalarynyń birinde Nasrallany «Bostandyqtyń dosy emes» jáne daýys berýdi bólý úshin usynylǵan solshyl partııanyń odaqtasy dep atady. Nasralla solshyl bıleýshi partııamen odaǵyn birneshe jyl buryn buzǵany belgili. 

Atap ótilgendeı, Tramp áskerı, ekonomıkalyq jáne saıası kúsh-qýatyn paıdalanyp, AQSh-ty Batys jarty shardaǵy basym álemdik derjavaǵa aınaldyrýǵa tyrysyp otyr.

Strategııanyń bir bóligi búkil Latyn Amerıkasy boıynsha odaqtas memleket basshylarynyń tizimin jasaý boldy, onyń ishinde Salvadordan Naııb Býkele, Argentınadan Haver Mıleı jáne Domınıkan Respýblıkasynan Lýıs Abınader jáne basqalary bar. Kelesi kezekte 30 qarashada prezıdent saılaýy bastalǵan Gondýras tur.

Buǵan deıin AQSh prezıdenti Donald Tramp Venesýela ústin jáne oǵan jaqyn aımaqtaǵy áýe keńistigin tolyq jabý týraly sheshim qabyldaǵanyn jazǵan bolatynbyz.