Tramp saılaýdaǵy burmalaýshylyqty áshkerelegenderge 1 mln dollar usyndy
ASTANA. KAZINFORM — AQSh prezıdenti Donald Tramp ótken nemese aldaǵy aralyq saılaýdaǵy burmalaýshylyqtar týraly aqparat bergen adamǵa 1 mln dollar tóleýge ýáde berdi, dep habarlaıdy TASS.
— Ótken saılaýda nemese 2026 jylǵy aldaǵy aralyq saılaýda daýystardy burmalaý faktileri týraly habarlaǵan ár adamǵa mundaı áreketterge qatysy bar adamdar qamaýǵa alynyp, sottalǵannan keıin 1 mln dollar tólenedi, — dep jazdy Tramp Truth Social áleýmettik jelisinde.
Alaıda ol mundaı aqparatty qaıda jáne qalaı jiberý keregin, sondaı-aq syıaqy qaı qarajat esebinen tólenetinin naqtylamady.
Tramp pen Respýblıkalyq partııanyń ózge de ókilderi 2020 jylǵy prezıdent saılaýynda zańbuzýshylyqtar bolǵanyn birneshe ret málimdegen edi. Sol saılaýda Demokratııalyq partııanyń ókili Djo Baıden jeńiske jetken. Respýblıkashyldar, atap aıtqanda, poshta arqyly berilgen bıýlletender men daýystardy sanaý mashınalarynyń qoldanylýyna kúmán keltirip, daýys berý qorytyndysyn moıyndamaǵan.
Respýblıkashyldar saılaý nátıjesi boıynsha sotqa birneshe ret shaǵymdanǵanymen, daýys berý qorytyndysyn joıý áreketteri iske aspady. Saılaý nátıjesine áser ete alatyndaı aýqymdy burmalaýshylyqtar bolǵanyn rastaıtyn senimdi dálelder usynylmady.
Sońǵy jyldary respýblıkashyldar basqaratyn birqatar shtatta daýys berý tártibine baqylaýdy kúsheıtý jóninde bastamalar kóterildi. Demokrattar bul sharalardyń keıbirin synap, olar azamattardyń saılaýǵa qatysýyn qıyndatýy múmkin ekenin málimdedi.
AQSh-ta aralyq saılaý 2026 jylǵy 3 qarashada ótedi. Saılaýshylar Ókilder palatasynyń barlyq múshesin jáne Senat quramynyń shamamen úshten birin tańdaıdy. Sonymen qatar birqatar shtatta gýbernator saılaýy ótedi. Qazir Kongrestiń qos palatasynda da respýblıkashyldar basymdyqqa ıe.
Aıta keteıik, Donald Tramp 24 qazanda Florıda shtatynda Kongreske aralyq saılaýda merziminen buryn daýys bergenin málimdedi.
