Tramp saýda soǵysynyń jańa kezeńin bastady

ASTANA. KAZINFORM – Tramp ákimshiligi AQSh-tyń 16 iri saýda seriktesine qatysty birqatar tergeý bastaıtynyn málimdedi. Bul ımportqa jańa tarıfterdiń engizilýine ákelýi múmkin, dep habarlaıdy NBC News. 

Habarlanǵandaı, bul prezıdent Donald Tramp bastaǵan aýqymdy jahandyq saýda soǵystarynyń kelesi kezeńi bolmaq. Osylaısha, AQSh Saýda ókiliniń keńsesi negizgi saýda seriktesteri, sonyń ishinde AQSh ımporty kózderiniń eń iri «bestigine» kiretin Eýropalyq Odaq, Meksıka jáne Qytaıǵa qatysty resmı tergeý bastap jatyr.

AQSh-tyń jańa sharalary 301-Bólim dep atalatyn saýda zańyna sáıkes sondaı-aq Sıngapýr, Shveıtsarııa, Norvegııa, Indonezııa, Malaızııa, Kambodja, Taıland, Ońtústik Koreıa, Vetnam, Taıvan, Bangladesh, Japonııa jáne Úndistanǵa áser etedi.

- Bul tergeýler bizdiń derekterimizge sáıkes, ekonomıkasynyń ártúrli óndiris salalarynda qurylymdyq artyq qýat baıqalyp otyrǵan, mysaly, saýda balansynyń úlken jáne turaqty oń saldo, sondaı-aq tolyq paıdalanylmaǵan nemese qýattary paıdalanylmaǵan elderge baǵyttalady, - dedi AQSh saýda ókili Djeımıson Grır.

Grırdiń aıtýynsha, AQSh sonymen qatar «májbúrli eńbek» arqyly óndirilgen ımporttyq taýarlarǵa qatysty tergeý júrgizýdi josparlap otyr.

Eske sala ketsek, AQSh Joǵarǵy soty Tramptyń keıbir álemdik tarıfin zańsyz dep tanydy. 

AQSh prezıdenti óziniń saýda saıasatyna qatysty Joǵarǵy sot sheshimin qarap shyqqan soń, buryn jarııalanǵan 10 paıyzdyń ornyna 15 paıyzdyq baj salyǵyn engizdi. 

Sondaı-aq 20-dan astam shtat Tramp engizgen jańa tarıfterge qatysty sotqa shaǵymdanǵanyn jazdyq.