Tramp sanktsııanyń Qazaqstanǵa qatysy bolmaıtyndyǵyna sendirdi - Nursultan Nazarbaev
ASTANA. QazAqparat - Elbasy Nursultan Nazarbaev taıaýdaǵy AQSh Prezıdenti Donald Tramppen telefon arqyly sóılesýin tarqata aıtyp berdi, dep habarlaıdy QazAqparat.
«Memleket basshysynyń telefonmen sóılesýleri - bul ádettegi is. Qońyraý shalamyz. Ol prezıdent bolyp saılanǵan kezde, qarashada telefon shaldym. Ol ýaqytta uzaq áńgimelestik. Ol bizdiń óńirdegi, Reseıdegi, Qytaıdaǵy ahýalǵa qyzyǵýshylyq tanytty. Odan keıin biz AQSh pen arab elderiniń kezdesýi ótken Er-Rııadta kezdestik. Keıin ol maǵan qońyraý shaldy. Onyń aldynda AQSh Energetıka mınıstrliginiń basshysy EKSPO-2017-ge kelip, men qabyldaǵan edim. Ol rıza bolyp, eksponattarǵa, kórme uıymdastyrý deńgeıine tań qaldy. Barǵannan keıin ol bastyǵyna baıandap, ol maǵan qońyraý shalýǵa sheshim qabyldaǵan sııaqty», - dedi Elbasy Aqordada ótip jatqan otandyq jáne sheteldik jýrnalıstermen kezdesýi barysynda.
Memleket basshysynyń aıtýynsha, amerıkalyq áriptesimen eń aldymen qazaqstandyq-amerıkalyq qarym-qatynas jaıynda sóılesken.
«Men AQSh-tyń kompanııalary Qazaqstanǵa 40 mlrd dollardan astam ınvestıtsııa salǵanyn eske saldym. Amerıkalyq bıznestiń qatysýymen 500 kompanııa jumys isteıdi, iri kompanııalary da bar. Men qazirgi ýaqytta bolyp jatqan sanktsııalardyń atalǵan kompanııalardyń jumysyna yqpal etpeýin suradym. Ol munyń Qazaqstanǵa qatysy joqtyǵyn rastady jáne AQSh Qazaqstanmen bul qarym-qatynastardy odan ary damytýǵa múddeli ekendigin qýattady», - dedi Nursultan Nazarbaev.
