Tramp Reuters agenttiginen úkimetten alǵan 9 mln dollar qaryzyn qaıtarýdy talap etti

ASTANA. KAZINFORM — Reuters agenttigi úkimetten «úlken áleýmettik aldaý» úshin mıllıondaǵan dollar aldy, dep habarlaıdy Independent.

Donald Tramp Reuters agenttiginen óziniń birinshi ákimshiligi kezinde bólingen jáne aqparat agenttiginen bólek jumys isteıtin kompanııaǵa aýdarylǵan aqshany dereý «qaıtarýdy» talap etti.

— DOGE: Qorǵanys mınıstrligi radıkaldy solshyl Reuters agenttigine «jappaı áleýmettik aldaýdy» zertteý úshin 9 000 000 dollar tólegen. Qaryz dereý qaıtarylsyn! , — dep jazdy Donald Tramp Truth Social saıtynda.

Taǵy bir jazbasynda Tramp:

— DOGE: Politico mıllıondaǵan dollarlardy bostan bos ne úshin berdi? Baspasózdi satyp alý úshin be??? Salyq tóleýshiler aqshasy qaıtarylsyn! New York Times qansha tóledi? Olar buqaralyq aqparat quraldaryn satyp alady, — dep qosty prezıdent.

Ilon Mask X paraqshasynda jazba qaldyryp, bul absolıýtti alaıaqtyq ekenin alǵa tartty.

— AQSh úkimeti Reuters agenttigine «jappaı áleýmettik aldaý» úshin mıllıondaǵan dollar tóledi. Satyp alý tapsyrysynda osylaı aıtylǵan! Bul absolıýtti alaıaqtyq. DOGE tergeýleri Qorǵanys mınıstrliginen 2018 jáne 2022 jyldar aralyǵyndaǵy «úlken áleýmettik aldaý» jobasy úshin Reuters agenttigine aýdarylǵan «jumbaq» tólemderdi anyqtady, — dep jazdy Mask.

Kelisimshart shyn máninde derekti taldaý jáne táýekelderdi azaıtý arqyly ózin «úkimetter men jahandyq ınstıtýttar úshin aýqymdy sheshimderdi jetkizýdegi senimdi kóshbasshy» retinde sıpattaıtyn Reuters-tiń múldem bólek enshiles kompanııasyna, Thomson Reuters Special Services (TRSS) kompanııasyna berildi. Kompanııa aqparat agenttiginen táýelsiz jumys isteıdi.

Buǵan deıin AQSh-tyń 14 shtaty Donald Tramp pen Ilon Masktyń ústinen sotqa shaǵym túsirgeni habarlanǵan bolatyn.