Tramp Respýblıkalyq partııa saılaýda jeńse, amerıkalyqtarǵa $5 myńnan tóleýge ýáde berdi
ASTANA. KAZINFORM — AQSh prezıdenti Donald Tramp qarashada ótetin aralyq saılaýda Respýblıkalyq partııa Kongrestegi ústemdigin saqtap qalsa, árbir eresek amerıkalyqqa 5 myń dollardan berýge ýáde etti. Bul týraly Kazinform VVS-ge silteme jasap habarlaıdy.
Tramp bul usynysyn Respýblıkalyq partııanyń aralyq saılaýǵa arnalǵan sezinde jarııalady.
— Eger atalǵan partııa AQSh Ókilder palatasy men Senattaǵy ústemdigin saqtap qalsa, ekonomıkamyzdyń orasan zor jetistiginiń arqasynda Amerıka Qurama Shtattarynyń árbir eresek azamatyna $5 myń kóleminde dıvıdend tóleımin, — dedi Tramp.
Aq úıdiń basshysy muny tabysty kompanııalardyń óz ınvestorlaryna dıvıdend tóleıtini sııaqty qadam dep túsindirdi.
— Bul dıvıdend tek AQSh aýmaǵynda paıdalanylýǵa tıis. Qarajattyń Kanadaǵa, Qytaıǵa nemese Germanııaǵa ketip, sol elderde jumsalǵanyn qalamaımyz. Aqsha el ekonomıkasyna qyzmet etýi kerek, — dedi ol.
Alaıda bul qarajatty kim bóletini, onyń jumsalýyn AQSh úkimeti qalaı qadaǵalaıtyny jáne mundaı tólemderdiń zańǵa qanshalyqty saı keletini ázirge belgisiz.
2025 jyly AQSh-taǵy eresekterdiń sany shamamen 267 mıllıon adam bolǵanyn eskersek, Tramp usynǵan dıvıdendterdi tóleýge $1,34 trıllıon qajet bolady.
Aıta keteıik, qazirgi saýalnamalardyń basym bóliginde Demokratııalyq partııa alda keledi. Partııanyń Ókilder palatasyndaǵy basymdyǵymen qatar, Senattaǵy baqylaýdy da óz qolyna alý múmkindigi joǵary.
Buǵan deıin bıyl ótken fýtboldan álem chempıonaty AQSh ekonomıkasyna $18 mlrd-tan astam kiris ákelgenin jazǵan bolatynbyz.
Aqzat Jıenalına
