Tramp Reseıdi Ýkraınadaǵy áskerı qaqtyǵysty toqtatýǵa shaqyrdy
ASTANA. KAZINFORM – AQSh prezıdenti Donald Tramp Reseıdi Ýkraınadaǵy áskerı qaqtyǵysty toqtatý jóninde kelissózder júrgizýge shaqyryp, dıplomatııa qajet ekenin aıtty. Sonymen qatar, qaqtyǵys jalǵasa berse, ekonomıkalyq turǵydan zardaby aýyr bolatynyn eskertti, dep habarlaıdy Kazinform.
– Reseıge zııan keltirgim kelmeıdi. Men orys halqyn jaqsy kóremin jáne radıkaldy solshyldardyń aıyptaýlaryna qaramastan prezıdent Pýtınmen árqashan óte jaqsy qarym-qatynasta boldym. Biz Reseı 60 000 000-ǵa jýyq adamnyń ómirin qıǵan Ekinshi dúnıejúzilik soǵysta jeńiske jetýge kómekteskenin eshqashan umytpaýymyz kerek. Osynyń bárin eskere otyryp, ekonomıkasy quldyrap bara jatqan Reseıge jáne prezıdent Pýtınge ÚLKEN JAQSYLYQ jasaıyn dep turmyn. Qazir-aq mámilege kelińizder de, myna mıǵa qonymsyz soǵysty TOQTATYŃYZ! ARTY JAQSY BOLMAIDY, – dep jazdy Tramp Truth Social paraqshasynda.
Ol sondaı-aq:
– Eger biz jaqyn arada «mámilege» kelmesek, Reseıdiń Amerıka Qurama Shtattaryna jáne basqa da elderge satatyn barlyq zattaryna joǵary salyqtar, tarıfter men sanktsııalar engizýden basqa mende amal qalmaıdy. Men prezıdent bolǵanda eshqashan bastalmaıtyn soǵysty aıaqtaıyq! Biz ońaı nemese qıyn joldy tańdaı alamyz – árıne, ońaı jol árqashan jaqsy. «MÁMІLE JASAÝ» ýaqyty keldi. ENDІ ADAMDAR ÓLMEÝІ KEREK!!!, – dep jazdy.
Buǵan deıin AQSh prezıdenti Donald Tramp óziniń komandasyna ınaýgýratsııadan keıin birneshe kún ishinde Reseı basshysy Vladımır Pýtınmen telefon arqyly sóılesýdi uıymdastyrýdy tapsyrǵany týraly jazǵan edik. Áńgimelesýdiń bir maqsaty — Ýkraınadaǵy qaqtyǵysty toqtatý úshin aldaǵy aılarda jeke kezdesýdi talqylaý.