Tramp Reseı men Ýkraına kelissózi kezinde Ystanbulǵa barýy múmkin ekenin aıtty
ASTANA.KAZINFORM - AQSh prezıdenti Donald Tramp jýrnalısterge 15 mamyr, beısenbide Reseı men Ýkraınanyń kelissózi kezinde Ystanbulǵa barý múmkindigin qarastyryp jatqanyn aıtty, dep habarlaıdy VVS.
- Men ushyp ketý kerek pe dep oıladym. Beısenbide qaıda bolatynymdy bilmeımin. Meniń kezdesýlerim óte kóp, biraq men shynymen de (Ystanbulǵa) barý múmkindigin qarastyrdym, - dep keltiredi Tramptyń sózin Reuters agenttigi.
Aldaǵy kúnderi AQSh prezıdentiniń Saýd Arabııasyna, BAÁ men Qatarǵa sapary josparlanǵan.
Ýkraınadaǵy qaqtyǵysqa baılanysty halyqaralyq dıplomatııada tarıhı betburys bolýy múmkin.
Reseı men Túrkııa Prezıdentteri – Vladımır Pýtın men Rejep Taıyp Erdoǵan telefon arqyly kelissóz júrgizdi. Onyń barysynda Máskeý osy jyldyń 15 mamyrynan bastap Ystanbulda Kıevpen tikeleı kelissózderdi qaıta bastaýdy usyndy.
Ankara bul usynysqa jedel jaýap berdi. Túrkııanyń TRT Haber telearnasynyń habarlaýynsha, Erdoǵan kelissózder alańyn qaıta usynýǵa daıyn ekenin rastady. Túrkııa Prezıdenti «beıbitshilikke qol jetkizý úshin múmkindikter terezesi ashyq» dedi jáne «atysty jan-jaqty toqtatý kelissózder júrgizýge jaǵdaı jasaıdy» dep málimdedi.
Alaıda Reseı SІM - niń resmı málimdemesinde bul aspekt – atysty toqtatý týraly aıtylmaǵan. Osyǵan qaramastan Erdoǵan Pýtınmen áńgimelesý qarsańynda Kıevke kelgen Frantsııa prezıdenti Emmanýel Makronmen sóılesti. Onyń aıtýynsha, Túrkııa beıbitshilikke qol jetkizýge, sonyń ishinde dıalogty uıymdastyrýǵa jáne soǵys qımyldaryn toqtatýǵa járdemdesýge úles qosýǵa daıyn.
Aıta keteıik, 5 mamyrda AQSh prezıdenti Donald Tramp Túrkııa Prezıdenti Rejep Taıyp Erdoǵanmen telefon arqyly sóılesip, áleýmettik jelidegi paraqshasynda Ýkraınada beıbitshilik ornatý protsesinde birlesip jumys isteýdi asyǵa kútetinin jazdy.
AQSh prezıdenti Donald Tramp bul apta Reseı men Ýkraına úshin mańyzdy bolatynyn aıtty.