Reseı men Ýkraına energetıkalyq nysandarǵa shabýyl jasamaý týraly kelisti — Tramp
ASTANA. KAZINFORM — AQSh prezıdenti Donald Tramptyń málimdeýinshe, Máskeý men Kıev energetıkalyq ınfraqurylymǵa bir-birine soqqy berýdi dereý toqtatýǵa kelisken. Bul týraly Kazinform agenttiginiń Vashıngtondaǵy menshikti tilshisi FOX News arnasyna silteme jasap habarlady.
— Reseı men Ýkraına arasyndaǵy soǵysta energetıkalyq nysandarǵa qatysty atysty toqtatý rejımi dereý kúshine enedi. Eki tarap ta kelisti. Ony buzbańyzdar! — dep jazdy Donald Tramp Truth Social áleýmettik jelisinde.
Tramptyń aıtýynsha, bul kelisim birneshe apta boıy munaı óńdeý zaýyttary men elektr stantsııalaryna jasalǵan shabýyldardan keıin shıelenisti báseńdetýge baǵyttalǵan. Onyń sózinshe, mundaı shabýyldar dızel otynyn jetkizýge kedergi keltirip, AQSh-ta baǵanyń ósýine yqpal etip otyr.
Energetıkalyq ınfraqurylymǵa shabýyldardy toqtatý týraly málimdeme Reseıdiń dızel otynyn AQSh pen álemdik naryqtarǵa jetkizýine múmkindik beretin kelisim jasalǵan tusta aıtyldy.
Kelisimge sáıkes, Reseı dereý 300 myń tonnadan astam dızel otynyn jetkizýge tıis. Qarasha aıynda qosymsha jetkizilimder kútiledi. Eksportty jeńildetý úshin AQSh sanktsııalyq shekteýlerdi de ýaqytsha jumsartqan.
Ýkraına prezıdenti Vladımır Zelenskıı bul jańalyqqa qatysty pikir bildirip, Ýkraınanyń energetıkalyq bitimdi qoldaıtynyn aıtty. Sondaı-aq Reseı tarapynyń da kelisimdi qoldaýy mańyzdy ekenin atap ótti.
— Biz AQSh tarapynan qosymsha aqparat kútemiz, — dep jazdy Zelenskıı X áleýmettik jelisinde.
Reseı tarapy ázirshe Tramptyń málimdemesine qatysty pikir bildirgen joq.
