Tramp Reseı men Qytaıǵa qorǵanys bıýdjetin eki ese qysqartýdy usynbaq

ASTANA. KAZINFORM – AQSh prezıdenti Donald Tramp Reseı kóshbasshysy Vladımır Pýtınmen jáne QHR tóraǵasy Sı Tszınpınmen múmkindiginshe tezirek kezdesý ótkizgisi keletinin málimdedi, dep habarlaıdy reseılik TASS aqparat agenttigi.

Tramptyń Aq úıde tilshilermen áńgimelesýi kezinde oǵan AQSh, Reseı jáne Qytaı arasynda úshjaqty sammıt ótkizýdi qarastyryp jatyr ma degen suraq qoıyldy.

- Men bul týraly jaǵdaı sál tynyshtalǵanda oılanyp kóremin, - dedi Tramp.

Bul rette ol óziniń 2021 jyly, ıaǵnı birinshi prezıdenttik merziminiń aıaqtalýy tusynda ýkraına daǵdarysy bolmaǵanyn jáne Taıaý Shyǵystaǵy jaǵdaı shıelenispegenin eske saldy.

- Men qaıtyp kelgende bári basqasha edi. Sondyqtan men bul máselelerdi retteıtin kezde, birinshi kezkte Qytaı tóraǵasy Sımen (Tszınpınmen), Reseı prezıdenti Pýtınmen kezdesýdi qalaımyn, - dep málimdedi Tramp.

Ol osy baılanystar barysynda «áskerı bıýdjetterdi eki ese azaıtýdy» talqylaǵysy keletinin túsindirdi.

- Bul qolymyzdan keledi. Meniń oıymsha, biz muny isteı alamyz, - dep túıindedi Tramp.

Buǵan deıin Reseı prezıdenti Vladımır Pýtın Amerıka lıderi Donald Tramppen telefon arqyly kelissóz júrgizdi.

Sodan keıin AQSh prezıdenti Donald Tramppen sóılesken Vladımır Zelenskıı bitimge kelýdi qalaıtynyn aıtqan.

Tramptyń aıtýynsha, onyń Reseı prezıdenti Vladımır Pýtınmen alǵashqy kezdesýi Saýd Arabııasynda ótedi, bul týraly olar telefon arqyly sóılesken kezde kelisken.

Kazinform úshin arnaıy TASS seriktes agenttigi usyndy.