Tramp Pýtınniń áskerı áreketterdi toqtatý týraly aıtqanyna qatysty pikir bildirdi
ASTANA.KAZINFORM — NATO Bas hatshysy Mark Rıýttemen kezdesý barysynda Donald Tramp Reseı prezıdenti Vladımır Pýtınniń yqtımal bitimge qatysty «óte úmit kúttiretin málimdeme» jasaǵanyn aıtty, dep habarlaıdy «Amerıka daýysy».
AQSh prezıdenti Donald Tramp beısenbi kúni Reseı prezıdenti Vladımır Pýtınniń Reseı men Ýkraına arasyndaǵy áskerı qımyldardy toqtatý týraly «óte úmit kúttiretin málimdeme» jasaǵanyn, biraq onyń «tolyq emes» ekenin málimdedi.
— Men onymen kezdeskim nemese sóıleskim keledi (telefon arqyly). Biraq biz bul máseleni tez arada sheshýimiz kerek, — dedi Donald Tramp Aq úıde NATO Bas hatshysy Mark Rıýtteni qabyldaý barysynda.
Máskeýde ótip jatqan konsýltatsııalarǵa toqtalǵan AQSh prezıdenti olardyń barysynda «qorytyndy kelisimniń kóptegen egjeı-tegjeıi» talqylanǵanyn atap ótti.
Buǵan deıin Reseı prezıdenti Vladımır Pýtın áskerı qımyldardy toqtatý sharttary týraly pikir bildirgen bolatyn.
AQSh prezıdentiniń Taıaý Shyǵystaǵy arnaıy ókili Stıv Ýıtkoff Reseı basshylyǵymen kelissózder júrgizý úshin Máskeýge bardy.