Tramp Pýtınmen kezdeser aldynda ne týraly aıtty

ASTANA. KAZINFORM — AQSh prezıdenti Donald Tramp Aq úıde baspasóz máslıhatyn ótkizdi. Ol Vladımır Pýtınmen aldaǵy kezdesýden konstrýktıvti nátıjeler kútetinin málimdedi. Sonymen qatar, Alıaskada ótetin sammıttiń aldyn ala kezdesý bolatynyn atap ótti, dep jazdy TASS.

Tramp Pýtındi Ýkraınadaǵy qaqtyǵysty aıaqtaýǵa kóndirýge nıetti ekenin aıtty.

— Bálkim, men (kezdesýden keıin) shyǵyp, sáttilik tilermin, solaı aıaqtalýy da múmkin. Bul máseleni sheshý qolymnan kelmeýi múmkin, — dedi AQSh prezıdenti.

Kezdesýden keıin Tramp Zelenskıı men eýropalyqtarǵa aqparat beretinin aıtty.

Alaıda ol Alıaskadaǵy sammıtke Zelenskııdi shaqyrý nıetin rastaǵan joq.

Tramp kezdesýdiń alǵashqy birneshe mınýtynda-aq Ýkraına boıynsha kelisimge kelý múmkin be, joq pa — sony túsinetinin jetkizdi.

Amerıkalyq kóshbasshy Máskeýmen saýda qatynastaryn qalypqa keltirýge bolatynyn aıtyp, «Reseıde óte qundy jer resýrstary bar» ekenin qosty.

Sondaı-aq, Tramp túptiń túbinde Pýtın men Zelenskııdi bir ústel basyna otyrǵyza alatynyna senimdi ekenin bildirdi.

Bul aqparat TASS agenttigi tarapynan Kazinform úshin arnaıy usynylǵan.

Eske salaıyq, Tramp Pýtınmen kezdesý úshin «Reseıge bara jatqanyn» málimdegen bolatyn.

Ótken aptada ol Pýtınmen kezdesý 15 tamyzda Alıaskada ótetinin jarııalaǵan.