Tramp prezıdenttik merzimi aıaqtalǵansha Kýba máselesin sheshkisi keletinin aıtty

ASTANA. KAZINFORM – AQSh prezıdenti Donald Tramp Aq úıdegi ókilettik merzimi aıaqtalǵanǵa deıin Kýba máselesin sheshýdi qalaıtynyn málimdedi. Sondaı-aq ol aral memleketine qarsy áskerı kúsh qoldaný múmkindigin de qarastyratynyn aıtty, dep habarlaıdy Anadolu agenttigi.

Tramp
Foto: Anadolu

Tramp bul týraly Salem News Channel telearnasyna bergen suhbatynda aıtty. Odan prezıdenttik merzimi aıaqtalǵanǵa deıin Kýbaǵa qarsy áskerı operatsııa júrgizýge ruqsat bere me dep suraǵan.

– Men qyzmetimnen ketpeı turyp Kýba máselesin sheshkim keledi, – dedi AQSh prezıdenti.

Ol Vashıngtonnyń araldaǵy jaǵdaıdy jiti baqylap otyrǵanyn atap ótti.

– Biz ondaǵy jaǵdaıdy muqııat qadaǵalap otyrmyz. Eldiń jaǵdaıy óte nashar. Negizinen, bul – sátsizdikke ushyraǵan memleket, – dedi Tramp.

Sondaı-aq ol ata-anasy Kýbadan shyqqan AQSh Memlekettik hatshysy Marko Rýbıony maqtady. Tramptyń aıtýynsha, Rýbıo da Kýba máselesin sheshýge múddeli.

– Men muny sol elden Amerıkaǵa kelip, kezinde qatty qıyndyq kórgen kýbalyqtardyń ıgiligi úshin jasaǵym keledi, – dedi ol.

AQSh prezıdenti Kýbaǵa qarsy áskerı kúsh qoldaný múmkindigin de joqqa shyǵarmady.

Aıta keteıik, AQSh-tyń qysymymen Kýba taǵy da jaryqsyz qalǵanyn jazdyq.

Sondaı-aq Vashıngton Kýbaǵa qarsy sanktsııalaryn keńeıtti. Bul prezıdent Mıgel Dıas-Kanel men Raýl Kastronyń otbasy múshelerine áser etti.