Tramp prezıdenttik merzimi aıaqtalǵansha «Altyn kúmbez» salýdy josparlap otyr

ASTANA. KAZINFORM — AQSh prezıdenti Donald Tramp «Altyn kúmbez» zymyranǵa qarsy qorǵanys júıesin qurý josparyn jarııalap, bul joba óz merziminiń sońyna deıin aıaqtalady dep boljady, dep habarlaıdy The New York Times.

«Altyn kúmbez» prezıdent Tramp qyzmetine kiriskennen beri basymdyqqa ıe boldy, óıtkeni saılaý naýqany kezinde ol Izraıldiń zymyrandar men snarıadtarǵa tosqaýyl jasaıtyn «Temir kúmbezine» uqsas syrtqy qaýipterden qorǵanys júıesin qurýǵa ýáde berdi.

Tramp baǵalaýynsha, jobanyń quny 175 mlrd dollardy quraıdy, biraq Kongrestiń bıýdjet basqarmasy zymyranǵa qarsy qorǵanys júıesine áldeqaıda kóp — 542 mlrd dollarǵa deıin qarajat qajet dep sanaıdy.

AQSh prezıdenti seısenbi kúni «Altyn kúmbez» onyń salyqty azaıtý jáne shyǵystar týraly zań jobasynan 25 mlrd dollar qarjy alatynyn, ony áli Kongress qabyldaýy kerek ekenin jáne Kanada bul baǵdarlamaǵa qatysýǵa múddeli jáne zymyranǵa qarsy qorǵanys shyǵyndarynyń bir bóligin bólisýi múmkin ekenin málimdedi.

Tramp Qurama Shtattar jobany shamamen úsh jylda aıaqtap, ony prezıdenttik merzimi aıaqtalǵanǵa deıin iske qosa alatynyna senim bildirdi. 

— «Altyn kúmbez» tolyǵymen salynǵannan keıin ol zymyrandardy álemniń basqa shetinen, tipti olar ǵaryshtan ushyrsa da ustap alady jáne bizde buryn-sońdy jasalǵan eń jaqsy júıe bolady, — dep habarlady Donald Tramp.

Tramp sonymen qatar jobany Ǵarysh kúshteriniń ǵaryshtyq operatsııalar bastyǵynyń orynbasary general Maıkl Getleın qadaǵalaıtynyn habarlady. 

Qańtar aıyndaǵy «Amerıkanyń temir kúmbezi» dep atalatyn jarlyqta Tramp Pentagonǵa amerıkalyq gıperdybystyq zymyrandardy jáne «ǵaryshtyq tosqaýyldardy» ázirleýdi qamtıtyn jospardyń egjeı-tegjeıin usynýǵa 60 kún berdi. 

Eske sala ketsek, Ońtústik Koreıa «Temir kúmbez» analogyn ázirlep jatyr.