Tramp Portlendke ásker jiberýge buıryq berdi

ASTANA. KAZINFORM – AQSh prezıdenti Donald Tramp eldiń batys jaǵalaýyndaǵy iri qala Portlendke, sondaı-aq Immıgratsııa jáne kedendik baqylaý qyzmetiniń (ICE) nysandaryna ásker kirgizýdi tapsyrdy, dep habarlaıdy VVS.

– Іshki qaýipsizdik mınıstri Krıstı Noemniń ótinishi boıynsha soǵys mınıstri Pıt Hegsetke soǵystan tıtyqtaǵan Portlendti jáne Antıfa men ózge de ishki terrorısterdiń qorshaýynda turǵan ICE nysandaryn qorǵaý úshin qajetti áskerdiń bárin jiberýdi tapsyrdym. Qajet bolǵan jaǵdaıda tolyq kúsh qoldanýǵa da ruqsat etemin, – dep jazdy Tramp Truth Social platformasynda.

Los-Andjeles, Vashıngton jáne Memfısten keıin Portlend prezıdent ásker jibergen AQSh-taǵy tórtinshi qala bolmaq.

Portlend meri, Demokratııalyq partııa ókili Kıt Ýılson buǵan deıin Tramptyń ásker kirgizý josparyna qarsy ekenin málimdegen edi.

– Men federaldyq bıliktiń aralasýyn suraǵan joqpyn ári oǵan muqtaj emespin, – dedi ol.

Sońǵy aılarda Portlendte ICE keńsesiniń aldynda Tramp ákimshiliginiń keńinen anyqtalatyn zańsyz ımmıgranttarǵa qarsy sharalaryn qatańdatýyna baılanysty narazylyq sherýleri ótip keledi.

Tramp óz jazbasynda Ulttyq gvardııany, álde AQSh-tyń turaqty qarýly kúshterin tartatynyn naqtylaǵan joq.

Eske sala keteıik, tamyz aıynda AQSh prezıdenti el astanasynda qylmys baqylaýdan shyǵyp ketkenin málimdegen soń úsh shtattyń gýbernatorlary Vashıngtonǵa Ulttyq gvardııa sarbazdaryn jibergen edi.

Ol kezde Tramp baspanasyzdardy qaladan ketýge tıis dep aıtqan bolatyn. Keıin ásker taǵy bir shtatqa engizildi.