Tramp Pentagonǵa dereý ıadrolyq qarýdy synaqtan ótkizýdi bastaýdy tapsyrdy
ASTANA.KAZINFORM - AQSh prezıdenti Donald Tramp AQSh-tyń ıadrolyq qarýdy synaqtan ótkizýdi bastaǵanyn jarııalady. Ol Pentagonǵa osyndaı buıryq bergen. Buıryq Truth Social jelisinde jarııalanǵan.
Donald Tramp basqa elderge qaraǵanda AQSh-ta ıadrolyq qarý kóbirek ekenin málimdedi.
- Buǵan men prezıdent laýazymyna alǵash saılanǵannan keıingi merzimde qol jetkizildi. Ol ýaqytta qoldanystaǵy qarýdyń barlyǵy jańartylyp, jańǵyrtyldy. Qarýdyń joıqyndylyǵyna qaraı men bul isti jek kórdim. Biraq, amal joq, atqarý kerek boldy. Reseı ekinshi orynda tur. Qytaı besinshi orynda, alaıda olar aldaǵy bes jylda teńesip qalady. Ózge elder synaqtan ótkizip jatqandyqtan men mınıstrlikke ózimizdiń ıadrolyq qarýymyzdy synaqtan ótkizýge buıryq berdim. Bul is meılinshe shuǵyl bastalady, - dedi Donald Tramp.
Buǵan deıin AQSh prezıdenti Donald Tramp olardyń arsenalynda ozyq qarý júıeleriniń bar ekenin jarııalaǵan bolatyn.
Osyǵan deıin Qytaıdyń AQSh-tan qaıtadan soıa satyp ala bastaǵany týraly jazdyq.