Tramp Pentagon basshysyn qoldaıtynyn málimdedi
ASTANA. KAZINFORM — AQSh prezıdenti Donald Tramp Aq úıdegi baspasóz máslıhatyna UFC basshysy Dana Ýaıtpen birge shyǵyp, jýrnalısterdi tańǵaldyrdy, dep habarlaıdy Kazinform agenttiginiń Vashıngtondaǵy menshikti tilshisi.
Tramp Dana Ýaıtty jýrnalısterdiń suraqtaryna jaýap berýge shaqyryp, baspasóz máslıhatyna azdap kóńil kúı qosýdy kózdegenin aıtty.
— Kópshilik ony Aq úıdiń jańa baspasóz hatshysy bolady dep oılaıdy. Men ony kópten beri bilemin, ol eshkimniń aldynda jaltaqtamaıdy, — dedi Donald Tramp.
— Men muny kópten beri armandap júr edim. Alǵashqy suraqty kim qoıady? — dep ázildedi Ýaıt minberge kóterilip.
Sonymen qatar ol saıasatqa aralasýǵa nıeti joq ekenin jáne Tramptyń baspasóz hatshysy qyzmetine úmitker emes ekenin aıtty. Bul týraly New York Post basylymy jazdy.
— Usynysyńyzǵa raqmet, myrza. Biraq saıasatpen aınalysqym kelmeıdi, — dedi Dana Ýaıt.
Sondaı-aq Tramp Pıt Hegsetke ımpıchment jarııalaý bastamasy kóterilse, Qorǵanys mınıstrin qoldaıtynyn aıtty. Bul týraly NBC News habarlady.
— Naǵyz sarbazdar, óz mindetin abyroımen atqaryp júrgen azamattar men naǵyz patrıottar Pıt Hegsetti qurmetteıdi. Ol óz jumysyn óte jaqsy atqaryp júr, — dedi Donald Tramp.
Sondaı-aq Ókilder palatasy Hegsetke ımpıchment jarııalaý týraly sheshim qabyldasa, ony qoldaıtynyn aıtty.
Buǵan deıin AQSh Kongresine Pıt Hegsetke ımpıchment jarııalaý jónindegi qarar usynylǵany habarlanǵan bolatyn.