Tramp pen Zelenskıı jabyq kelissózdi aıaqtap, Eýropa kóshbasshylarymen kezdesti

ASTANA. KAZINFORM – Ýkraına prezıdenti Vladımır Zelenskıı men AQSh prezıdenti Donald Tramp Aq úıdegi jabyq kelissózdi aıaqtap, eýropalyq kóshbasshylarmen kezdesýge kiristi, dep habarlaıdy CNN.

Kópjaqty kezdesý de jabyq formatta ótedi. Aldyn ala qatysýshylar estelik fotosessııaǵa tústi.

Buǵan deıin Tramp pen Zelenskııdiń ashyq kezdesýi ótken edi. Onda Aq úı basshysy Ýkraınaǵa «qýatty» qaýipsizdik kepildikterin berýge jáne «úlken kólemde kómek» kórsetýge ýáde etti.

– Qaýipsizdik máseleleri boıynsha óte, óte kóp kómek beremiz. Bul jaqsy bolady, – dedi Tramp Zelenskıımen kezdesýde.

Ol sondaı-aq yqtımal beıbit kelisimdi saqtaý úshin amerıkalyq áskerlerdi Ýkraınaǵa jiberý múmkindigin joqqa shyǵarmady.

Aq úı basshysy «oq atýdy toqtatý» emes, «bitim men uzaq merzimdi beıbitshilik» ornaǵanyn qalaıtynyn atap ótti. Sonymen birge Ýkraınaǵa NATO-ǵa kirý múmkindigine qarsy ekenin málimdedi.

Óz kezeginde Vladımır Zelenskıı Ýkraına soǵysty toqtatýdyń «dıplomatııalyq jolyn» tabýǵa daıyn ekenin aıtyp, Kıevtiń Máskeý jáne Vashıngtonmen úshjaqty kezdesý ótkizýge nıetti ekenin taǵy da jetkizdi.

Sondaı-aq ol Ýkraınada beıbit kelisim jasalyp, qaýipsizdik kepildigine qol jetkizilgen jaǵdaıda prezıdenttik saılaý ótkizýge daıyn ekenin atap ótti.

Tramp búgingi kezdesýlerden keıin Reseı prezıdenti Vladımır Pýtınmen telefon arqyly sóılesetinin habarlady. Onyń aıtýynsha, áńgime barysynda ózi, Pýtın jáne Zelenskıı qatysatyn úshjaqty kezdesý ıdeıasyn talqylamaq.

Aıta keteıik, ashyq kezdesýden soń Tramp pen Zelenskııdiń jabyq kelissózderi ótken bolatyn.