Tramp pen Zelenskıı arasynda mıneraldar boıynsha kelisimge qol qoıylmaı qaldy

ASTANA. KAZINFORM – Reuters agenttiginiń AQSh ákimshiligindegi derekkózi AQSh pen Ýkraına prezıdentteri qol qoıýy tıis mıneraldar týraly kelisimge qol qoıylmaı qalǵanyn jetkizdi, dep habarlaıdy BBC.

AQSh pen Ýkraına prezıdentteriniń Vashıngtonda ótken kezdesýi aıaqsyz qaldy. Taraptar Ýkraınanyń jer qoınaýy týraly aralyq kelisimge qol qoımady. Olar jabyq esik jaǵdaıyndaǵy qyzý pikirtalastan soń kezdesýdi shuǵyl toqtatty.

Vladımır Zelenskııdi qurmetsizdik tanytty dep aıyptaǵan Donald Tramp, birden Truth Social áleýmettik jelisindegi paraqshasyna jazba qaldyrdy.

Onyń oıynsha, Ýkraına prezıdenti beıbitshilikke daıyn emes.

- Búgin biz úshin óte mańyzdy kezdesý boldy. Biz osyndaı qyzý áńgimeniń jáne qysymnyń áserimen bolmasa basqadaı jaǵdaıda esh túsinýge bolmaıtyn nárseler týraly bildik, - dep jazdy Tramp.

- Bundaı emotsııadan neni túsinýge bolady. Meniń túsingenim, Zelenskıı AQSh aralasqaly otyrǵan beıbitshilikke daıyn emes. Ol bizdiń qatysýymyz kelissózder barysynda oǵan úlken basymdyq beredi dep oılaıdy, -

- Maǵan basymdyq kerek emes, maǵan beıbitshilik kerek. Ol bizge qurmetsizdik tanytty. Ol beıbitshilikke daıyn bolǵan kezde kele alady, - dep jazdy AQSh prezıdenti.

Zelenskıı Aq úıden shyǵyp ketti.

Osyǵan deıin taraptar arasynda týyndaǵan daý týraly jazǵan edik.