Tramp pen Sı Tszınpınniń kezdesýi: AQSh Qytaı taýarlaryna baj salyǵyn tómendetedi

ASTANA. KAZINFORM – Ońtústik Koreıada ótken Donald Tramp pen Sı Tszınpınniń kezdesýinen soń eki el arasyndaǵy sırek kezdesetin metaldarǵa qatysty daý sheshimin tapty, dep habarlaıdy Kazinform agenttiginiń menshikti tilshisi.

Sondaı-aq bul kezdesýde Beıjiń AQSh-tan soıa satyp alý, sırek kezdesetin metaldardy eksporttaýǵa ruqsat berý jáne fentanılge qatysty qatań sharalar qabyldaý mindettemelerin aldy. Oǵan jaýap retinde AQSh Qytaıdan keletin taýarlarǵa baj salyǵyn tómendetýge kelisti.

AXIOS habarlaýynsha, Vashıngtonǵa qaıtyp bara jatqanda prezıdenttik ushaqta jýrnalısterdiń saýalyna jaýap bere otyryp Tramp Qytaı eksportyna baj salyǵy 57%-dan 47%-ǵa deıin tómendeıtinin aıtty.

Al CNBC jazýynsha, AQSh prezıdenti mańyzdy kezdesýde kóptegen sheshim qabyldanǵanyn jáne sırek kezdesetin metaldarǵa qatysty daýdyń sheshilgenin málim etken.

Odan bólek Tramp Qytaımen sırek kezdesetin metaldardy jetkizý týraly kelisimge qol jetkizgenin jáne onyń sharttary jyl saıyn qaıta qaralyp otyratynyn habarlady.

Fentanılge baj 20%-dan 10%-ǵa deıin tómendetiledi. Óz kezeginde Beıjiń fentanıldiń taralýyn toqtatý úshin bar kúshin salady jáne AQSh-tan soıa men basqa da aýylsharýashylyq ónimderin qaıta satyp ala bastaıdy.

Tramp taraptar NVIDIA jáne basqa da kompanııalarmen chıpterdi Qytaıǵa satý týraly kelissóz júrgizetinin aıtty. AQSh prezıdentiniń aıtýynsha, Taıvan taqyryby talqylanbaǵan. Sondaı-aq qazirgi ýaqytta Tramp Qytaı taýarlaryna 100% qosymsha baj salmaıtyny aıtyldy.

Tramp sáýir aıynda Beıjińge baratynyn, sodan keıin Sı Tszınpın AQSh-qa saparlaıtynyn habarlady.

Al Qytaı bul aqparatty resmı túrde rastaǵan joq.

Aıta keteıik, Qytaı AQSh-tan qaıtadan soıa satyp ala bastady.