Tramp pen iri tehnologııalyq kompanııalar JI-di baqylaý jóninde kelisimge keldi
ASTANA. KAZINFORM — AQSh prezıdenti Donald Tramp seısenbi kúni iri tehnologııalyq kompanııalardyń basshylary jasandy ıntellektini damytýǵa arnalǵan erikti standarttardy engizýge keliskenin málimdedi. Ol sondaı-aq JI qaýipsizdigine qatysty alańdaýshylyq kúsheıip otyrǵanyna qaramastan, derekterdi óńdeý ortalyqtaryn jedel ári aýqymdy túrde keńeıtýge qoldaý bildiretinin rastady. Bul týraly Kazinform Reuters agenttigine silteme jasap habarlaıdy.
Tramp bul málimdemesin Aq úıde tehnologııa salasyndaǵy iri kompanııalardyń basshylarymen kezdeskennen keıin jasady. AQSh prezıdenti áleýmettik jelide jarııalaǵan kelisimge sáıkes, kompanııalar jasandy ıntellekt júıeleriniń qaýipsiz ári ázirleýshileri belgilegen talaptarǵa saı jumys istep turǵanyn teksertý úshin táýelsiz mamandardyń baǵalaýyna júginýge kelisken.
Kelisimge Tramp, Anthropic, Google, Meta, OpenAI jáne Nvidia kompanııalarynyń basshylary, sondaı-aq xAI kompanııasynyń negizin qalaýshy Ilon Mask qol qoıdy.
Kompanııalar JI quraldarynyń tehnıkalyq júıelerdi buzyp, olarǵa ruqsatsyz qol jetkizbeýi úshin qajetti sharalardy qabyldaıtyndaryn málimdedi.
Tramp jasandy ıntellekt quraldarynyń qaýipsizdigin baqylaý úshin 10 adamnan turatyn arnaıy keńes qurý múmkindigin qarastyryp jatqanyn habarlady. Alaıda onyń quramyna kimder kiretini ázirge naqtylanǵan joq. Sonymen qatar ol Aq úıdiń jasandy ıntellekt salasyndaǵy saıasatyn úılestiretin jańa laýazymdy tulǵany jaqyn arada taǵaıyndaıtynyn aıtty. Tramp bul tehnologııany resmı túrde «sýperıntellekt» dep atady.
Bul kezdesý JI-diń qaýipsizdigine qatysty qoǵam alańdaýshylyǵyn kúsheıtken birneshe oqıǵadan keıin uıymdastyryldy. Olardyń ishinde JI agentteriniń baqylaýdan shyǵyp, AQSh-tyń federaldyq derekqorlaryna buzyp kirýge tyrysqany da bar.
Buǵan deıin OpenAI ázirlegen jańa JI agenti ishki synaqtar barysynda korporatsııalar men úkimetterdiń nusqaýlaryna baǵynbaý týraly nusqaýlyqty ózdiginen jasap alǵan.
Birneshe kún buryn OpenAI-diń modelderiniń biri oqytý barysynda baqylaýdan shyǵyp, qorǵanys tetikterin aınalyp ótip, Avstralııa úkimetiniń saıtyna buzyp kirgen. Osy oqıǵadan keıin OpenAI men Anthropic kompanııalarynyń basshylary Avstralııa Senatyna shaqyryldy.
