Tramp pen Pýtın Majarstanda kezdesedi

ASTANA. KAZINFORM – AQSh jáne Reseı prezıdentteri Donald Tramp pen Vladımır Pýtın telefon arqyly sóılesti, dep habarlaıdy Kazinform agenttigi. 

Áńgime eki saǵattan astam ýaqytqa sozyldy.

Aq úı basshysy áńgimelesýdiń nátıjeli ótkenin atap ótti.

– Prezıdent Pýtın meni jáne Amerıka Qurama Shtattaryn Uly jetistikpen – Taıaý Shyǵystaǵy beıbitshiliktiń ornaýymen quttyqtady. Ol bul týraly ǵasyrlar boıy armandadyq dedi. Men shynymen senemin: Taıaý Shyǵystaǵy tabys Reseı men Ýkraına arasyndaǵy soǵysty toqtatý jónindegi kelissózderimizge kómektesedi, – dep jazdy Tramp Truth Social jelisindegi paraqshasynda.

Sonymen qatar amerıkalyq lıderdiń aıtýynsha, olar Ýkraınadaǵy qaqtyǵys rettelgennen keıin Reseı men AQSh arasyndaǵy saýda máselesin de talqylaǵan.

– Áńgime sońynda kelesi aptada eki eldiń joǵary laýazymdy keńesshileriniń kezdesýin ótkizýge ýaǵdalastyq, – dedi Tramp.

AQSh tarapynan alǵashqy kezdesýlerge memlekettik hatshy Marko Rýbıo jáne esimderi keıin jarııalanatyn birqatar tulǵa qatysady. Kezdesýdiń naqty orny keıin anyqtalady.

Aq úı basshysy atap ótkendeı, sodan keıin ol Pýtınmen Býdapeshtte kezdesedi.

Sondaı-aq Tramp 17 qazanda Ýkraına prezıdenti Vladımır Zelenskıımen Aq úıdiń Oval kabınetinde kezdesip, Pýtınmen áńgime jáne basqa da máselelerdi talqylaıtynyn aıtty.

Eske salaıyq, bıyl tamyz aıynda Tramp pen Pýtın Alıaska shtatyndaǵy «Elmendorf–Rıchardson» áskerı bazasynda kelissózder ótkizgen bolatyn.