Tramp pen Pýtın Shenchjende kelissóz júrgizdi
ASTANA. KAZINFORM — AQSh Prezıdenti Donald Tramp pen Reseı Prezıdenti Vladımır Pýtın Qytaıda ótken Azııa-Tynyq muhıty ekonomıkalyq yntymaqtastyǵy sammıti aıasynda kezdesip, odan keıin QHR Tóraǵasy Sı Tszınpınmen birlesken kelissóz ótkizedi, dep habarlaıdy Kazinform agenttiginiń Vashıngtondaǵy menshikti tilshisi CBS News-ke silteme jasap.
– Biz kóp jyl boıy jaqsy qarym-qatynasta boldyq. Bul kezdesýden oń nátıje kútýge bolady dep oılaımyn. Qalaı bolǵanda da, jaqsy bir istiń bastamasy bolaryna senimdimin, – dedi Donald Tramp kezdesý aldynda.
Jıynǵa AQSh Memlekettik hatshysy Marko Rýbıo, Qarjy mınıstri Skott Bessent, Reseı Syrtqy ister mınıstri Sergeı Lavrov jáne Reseıdiń ózge de resmı ókilderi qatysty.
Aıta keteıik, Pýtınmen qol alysyp amandasýǵa bettegen Tramp odan: «Bul kim?» dep surap, artynsha kúlip: «Bul meniń dosym», – dedi.
Tramp pen Pýtınniń kezdesýi shamamen 40 mınýtqa sozyldy. Aq úı ony ekijaqty kezdesýge qaraǵanda beıresmı sıpattaǵy «jeke kezdesý» dep atady. Al kelissóz qorytyndysy ázirge jarııalanǵan joq.
Kelesi kezekte Tramp Sı Tszınpınmen kezdesedi. Odan keıin Qytaı, Reseı jáne AQSh basshylarynyń úshjaqty kezdesýi ótedi.
AQSh Prezıdenti Qytaı men Reseı basshylarymen ıadrolyq qarýsyzdaný máselesin talqylaýdy josparlap otyrǵanyn málimdedi. Bul eki el AQSh-pen birge álemdegi ıadrolyq qarýy eń kóp úsh memlekettiń qataryna kiredi. Sondaı-aq kezdesýde ózge de halyqaralyq máseleler talqylanady.
Buǵan deıin Tramptyń Pýtın jáne Sı Tszınpınmen kezdesý úshin Qytaıǵa barǵany habarlanǵan bolatyn.