Tramp pen Mask uzaq úzilisten soń kópshilik aldyna birge shyqty

ASTANA. KAZINFORM – AQSh prezıdenti Donald Tramp pen kásipker Ilon Mask 21 qyrkúıek kúni Arızona shtatynda ótken marqum Charlı Kırkke arnalǵan qoshtasý rásimine qatysty. Bul – olardyń mamyr aıynda aralarynda kelispeýshilik týyndaǵannan keıin alǵash ret kópshilik aldynda birge boı kórsetýi, dep habarlady Lianhe Zaobao basylymy.

CNN habarlaýynsha, is-shara sport arenasynda uıymdastyrylyp, Tramp pen Mask prezıdenttik lojada qatar otyryp, áńgimelesken. BAQ-qa túsirilgen kadrlarda olardyń qol alysyp, jyly shyraı tanytqany baıqaldy. Keıinirek Mask áleýmettik jelide Tramppen sóılesip otyrǵan sátinen sýret jarııalap, oǵan «Charlı úshin» dep jazdy.

Qorǵanys mınıstri Pıt Hegsestiń sóz sóılep turǵan kezinde de Tramp pen Mask qyzý áńgimege berilip, qol qımyldarymen pikir almasyp otyrǵany kózge tústi. Mask áńgime barysynda jıi bas ızep, kóńil qoıa tyńdaǵan. Bul olardyń mamyr aıynda Mask memlekettik qyzmetten ketkennen keıingi alǵashqy birlesken resmı kórinisi boldy.

Jýrnalısterdiń suraqtaryna jaýap bergen Tramp: «Ol (Mask) kelip sálemdesti. Qarym-qatynasymyz óte jaqsy», – dep atap ótti. Aqparat kózderiniń málimetinshe, Kırk eki taraptyń baılanysyn qalpyna keltirýge dánekerlik jasaǵan. Ol Maskpen turaqty baılanysta bolyp, túrli saıası máseleler jóninde pikir almasyp otyrǵan.

Aıta keteıik, 31 jastaǵy konservatıvti kózqarastaǵy belsendi Charlı Kırk – Tramptyń jaqyn seriktesi. Ol 10 qyrkúıekte ıÝta alqabyndaǵy ýnıversıtette sóılep turǵan kezinde qastandyq jasalyp, qaza tapqan bolatyn.